ఆస్ట్రేలియాలో పనిచేయాలంటే...

ఫార్మసీలో మాస్టర్స్‌ చేశాను క్లినికల్‌ రిసెర్చ్‌ ఫీల్డ్‌లో ఏడేళ్ల అనుభవం ఉంది. ఇదే రంగంలో ఆస్ట్రేలియాలో పనిచేయాలంటే అదనంగా డిప్లొమా లేదా సర్టిఫికెట్‌ కోర్సులు చేయాలా?

- పి.రవితేజ

సాధారణంగా మనదేశ ఉద్యోగానుభవంతో అమెరికా, కెనడా, ఆస్ట్రేలియాల్లో నేరుగా ఉద్యోగం పొందటం కొంత కష్టమే. మీరు ఆస్ట్రేలియన్‌ నేషనల్‌ యూనివర్సిటీ, యూనివర్సిటీ ఆఫ్‌ సిడ్నీ, యూనివర్సిటీ ఆఫ్‌ మెల్‌బోర్న్‌, మోనాశ్‌ యూనివర్సిటీ లాంటి ప్రముఖ యూనివర్సిటీల్లో ఏదో ఒకదానిలో క్లినికల్‌ రిసెర్చ్‌లో మరొక పీజీ చేస్తే మీ ఏడేళ్ల పని అనుభవంతో మెరుగైన ఉద్యోగం పొందవచ్చు. అలాకాకుండా కోర్స్‌ఎరా, యుడెమి, ఎడెక్స్‌ లాంటి ఆన్‌లైన్‌ వేదికల్లోనో, ప్రముఖ యూనివర్సిటీలు అందించే క్లినికల్‌ రిసెర్చ్‌ సంబంధిత కోర్సులనో చేసే ప్రయత్నం చేయండి. ఆ తరువాత మీరు ప్రస్తుతం పనిచేస్తున్న సంస్థ ద్వారా అమెరికా/కెనడా/ ఆస్ట్రేలియా దేశాల్లో ఉన్న ప్రముఖ క్లినికల్‌ రిసెర్చ్‌ ల్యాబుల్లో ట్రైనీ/ అప్రెంటిస్‌గా చేరవచ్చు. కొంత విదేశీ ఉద్యోగానుభవం పొందాక ఆస్ట్రేలియాలో ఉద్యోగాలకోసం ప్రయత్నించండి.

- ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌