విదేశాల్లో పీహెచ్‌డీ ఎలా?

మా అబ్బాయి ఎమ్మెస్సీ (హ్యూమన్‌ జెనెటిక్స్‌) రెండేళ్ల కిందట పూర్తిచేశాడు. పరిశోధన కోసం విదేశాలకు వెళ్లాలనుకుంటున్నాడు. జీఆర్‌ఈ కూడా క్లియర్‌ చేశాడు. విదేశీ విశ్వవిద్యాలయంలో చేరాలంటే ఏం చేయాలి?

జి.నాగలక్ష్మి

విదేశాల్లో పరిశోధన చేయాలంటే.. అక్కడి యూనివర్సిటీల్లో పీజీ చేసి ఉండటం శ్రేయస్కరం. ముందుగా పరిశోధనా అంశాన్ని, అందుకు తగిన యూనివర్సిటీని, సరైన గైడ్‌ని ఎంచుకోవాలి. విదేశాల్లో అడ్మిషన్‌ విధానం, పరిశోధన పద్ధతులు మనకంటే భిన్నంగా ఉంటాయి. అక్కడి పరిస్థితులపై అవగాహన ఏర్పర్చుకోవాలి. కనీసం రెండు పరిశోధనా పత్రాలు మంచి జర్నల్స్‌లో ప్రచురించి ఉంటే, మీ అబ్బాయి పీహెచ్‌డీ అడ్మిషన్‌ సులువు అవుతుంది. చాలామంది విదేశాల్లో పీజీలో చేరి, రెండో సంవత్సరంలో ఆ పీజీ అడ్మిషన్‌ని పీహెచ్‌డీ అడ్మిషన్‌గా మార్చుకుంటారు. పరిశోధనలో ముఖ్యమైన విషయం- మనం పరిశోధన చేయాలనుకుంటున్నవారి నమ్మకం పొందటం. ఆ నమ్మకం వ్యక్తిగత పరిచయం, ప్రచురించిన పరిశోధనపత్రాల నాణ్యత, పీజీ చదివిన విశ్వవిద్యాలయ అంతర్జాతీయ ర్యాంకింగ్‌, ఇక్కడి ప్రొఫెసర్లు ఇచ్చే రికమెండేషన్‌ లెటర్స్‌ వల్ల వస్తుంది. అవకాశం ఉంటే మీ అబ్బాయిని మనదేశంలోనే ఏదైనా ప్రతిష్ఠాత్మక విద్యాసంస్థలో మంచి పరిశోధన నేపథ్యం ఉన్న ప్రొఫెసర్‌ దగ్గర ప్రాజెక్ట్‌లో చేరి, పరిశోధన మెలకువలను నేర్చుకోమని చెప్పండి. నాణ్యమైన పరిశోధనపత్రాలను ప్రచురించి, విదేశాల్లో మంచి యూనివర్సిటీలో పీహెచ్‌డీ ప్రవేశం పొందేలా ప్రోత్సహించండి. అలా కుదరని పక్షంలో ప్రముఖ విదేశీ యూనివర్సిటీలో పీజీ చేయమని చెప్పండి.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌