బయోటెక్‌ పీజీతో ఏ అవకాశాలు?

బయో టెక్నాలజీలో పీజీ చేయాలనుంది. తెలుగు రాష్ట్రాల్లో ఏ యూనివర్సిటీల్లో ఈ కోర్సు ఉంది? ప్రభుత్వ, ప్రైవేటు రంగాల్లో ఏ ఉద్యోగావకాశాలుంటాయి.

గణేష్‌

బయోటెక్నాలజీలో పీజీ కోర్సు రెండు తెలుగు రాష్ట్రాల్లో వివిధ ప్రభుత్వ, ప్రైవేటు యూనివర్సిటీల్లో, ప్రైవేటు కళాశాలల్లో ఉంది. తెలంగాణలో యూనివర్సిటీ ఆఫ్‌ హైదరాబాద్‌, ఉస్మానియా యూనివర్సిటీ, జవహర్‌లాల్‌ నెహ్రూ టెక్నలాజికల్‌ యూనివర్సిటీ, ఎన్‌ఐటీ వరంగల్‌, కాకతీయ యూనివర్సిటీలు ఈ కోర్సును అందిస్తున్నాయి. ఆంధ్రప్రదేశ్‌లో.. ఆంధ్రా యూనివర్సిటీ, శ్రీవేంకటేశ్వర యూనివర్సిటీ, జవహర్‌లాల్‌ నెహ్రూ టెక్నలాజికల్‌ యూనివర్సిటీ కాకినాడ/ అనంతపురం, ఆచార్య నాగార్జున యూనివర్సిటీ, శ్రీ కృష్ణదేవరాయ యూనివర్సిటీల్లో ఎమ్మెస్సీ బయోటెక్నాలజీ కోర్సు చదివే అవకాశం ఉంది. బయోటెక్‌ పీజీ చేసినవారికి ప్రభుత్వ, ప్రైవేటు పరిశోధన సంస్థల్లో ఉపాధి లభిస్తుంది. సీడ్‌, బయోటెక్‌ కంపెనీలు, వ్యవసాయ పరిశోధన సంస్థలు, ఫుడ్ పరిశ్రమలు, బయో ప్రాసెసింగ్‌, ఫార్మా, కెమికల్‌ కంపెనీలు, ఎన్విరాన్‌మెంటల్‌ రిసెర్చ్‌ సంస్థల్లో, బోధన రంగంలో ఉద్యోగావకాశాలుంటాయి.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌