సైకాలజీ చదివితే..?

ఇంటర్‌ పాసయ్యాను. సైకాలజీ మెయిన్‌గా బీఏ చదవాలనుంది. ఈ కోర్సుతో ఉద్యోగావకాశాలు ఎలా ఉంటాయి?

టి.శ్రీకాంత్‌

డిగ్రీలో సైకాలజీ సబ్జెక్టుతో పాటు ఇంగ్లిష్‌ లిటరేచర్‌, ఎకనామిక్స్‌, జర్నలిజం లాంటివి కూడా చదివే అవకాశం ఉంది. జాతీయ విద్యావిధానం-2020 పూర్తి స్థాయిలోకి అమల్లోకి వస్తే సైకాలజీతో పాటు మీకు నచ్చిన సబ్జెక్టులు ఏవైనా/ ఎన్నయినా ఎంచుకునే వీలుంటుంది. సైకాలజీలో నాలుగు సంవత్సరాల ఆనర్స్‌ కోర్సు, ఐదేళ్ల ఇంటిగ్రేటెడ్‌ పీజీ కూడా చేయొచ్చు. ఉన్నత విద్యతో మెరుగైన ఉపాధి అవకాశాలు దక్కుతాయి. సాధారణంగా ఈ కోర్సు చదివిన వారు కౌన్సెలర్‌, ట్రైనర్‌లుగా స్థిరపడతారు. మీకు బోధనపై ఆసక్తి ఉంటే సైకాలజీలో పీహెచ్‌డీ చేసి అధ్యాపకులుగా రాణించవచ్చు. సైకాలజీ చదివినవారికి మేనేజ్‌మెంట్‌, ఎడ్యుకేషన్‌ రంగాల్లో ఉపాధి అవకాశాలుంటాయి. ఈ సబ్జెక్టులో చాలా స్పెషలైజేషన్‌లు అందుబాటులో ఉన్నాయి. వాటిలో.. కౌన్సెలింగ్‌ సైకాలజీ, ఎడ్యుకేషన్‌ సైకాలజీ, ఇండస్ట్రియల్‌ అండ్‌ ఆర్గనైజేషనల్‌ సైకాలజీ, క్లినికల్‌ సైకాలజీ, హెల్త్‌ సైకాలజీ, స్పోర్ట్స్‌ సైకాలజీలు ముఖ్యమైనవి. డిగ్రీ పూర్తి చేశాక మీ అభిరుచికి అనుగుణంగా స్పెషలైజేషన్‌ని ఎంచుకొని ఆ రంగంలో ఉద్యోగ ప్రయత్నాలు చేయండి. సైకాలజీ చదివినవారు జర్నలిజం, సోషల్‌ వర్క్‌, కెరియర్‌ కౌన్సిలింగ్‌ రంగాల్లో కూడా ఉద్యోగ ప్రయత్నాలు చేయవచ్చు. సైకాలజిస్టులకు విదేశాల్లో డిమాండ్‌ ఉంది. ఆసక్తి ఉంటే అక్కడే ఉన్నతవిద్యను చదివే ప్రయత్నం కూడా చేయవచ్చు.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌