ఆస్క్‌ ది ఎక్స్‌పర్ట్‌

నేను ఒకటో తరగతి నుంచి తొమ్మిదో తరగతి వరకు హైదరాబాద్‌లో చదివాను. ఆ తర్వాత ఆంధ్రప్రదేశ్‌లో ప్రైవేట్‌గా పదోతరగతి చేశాను. నాకు తెలంగాణ స్థానికత వర్తిస్తుందా?

- సాంబ
జ: మీ ప్రాథమిక విద్యాభ్యాసమంతా తెలంగాణలోనే జరిగింది కాబట్టి ఇక్కడి స్థానికత కచ్చితంగా వర్తిస్తుంది.

నేను డిగ్రీ పాసై గ్రూప్‌-2కి ప్రిపేర్‌ అవుతున్నాను. 2018లో నాపై ఐపీసీ 337 కింద యాక్సిడెంట్‌ కేసు నమోదైంది. తర్వాత లోక్‌ అదాలత్‌లో రాజీ కుదరడంతో కేసు కొట్టేశారు. ప్రభుత్వ ఉద్యోగాలకు దరఖాస్తు చేసుకోవడానికి అర్హత ఉందా? దరఖాస్తులో ఈ కేసుకు సంబంధించిన వివరాలను ఇవ్వాలా?

- మహ్మద్‌
జ: శిక్షపడలేదు కాబట్టి ప్రభుత్వ ఉద్యోగాలకు దరఖాస్తు చేసుకోవడానికి ఎలాంటి ఇబ్బంది ఉండదు. అయితే దరఖాస్తులో వివరాలను తెలియజేయాల్సి ఉంటుంది.

ఆచార్య నాగార్జున విశ్వవిద్యాలయం నుంచి ఓపెన్‌ డిగ్రీ పూర్తి చేశాను. తెలంగాణలో డిగ్రీ అర్హతతో వచ్చే నోటిఫికేషన్‌లకు దరఖాస్తు చేసుకోవచ్చా?
జ: మీరు నిస్సంకోచంగా తెలంగాణలో డిగ్రీ అర్హతతో వచ్చే నోటిఫికేషన్‌లకు దరఖాస్తు చేసుకోవచ్చు.
 

ప్రిపరేషన్‌ టెక్నిక్‌

ఆర్థిక సర్వేలు, బడ్జెట్‌ నివేదికలు చాలా విస్తృతంగా ఉంటాయి. అంతా నేర్చుకుంటూ పోతే పెద్దగా ఉపయోగం ఉండదు. పైగా సమయం వృథా. ఆ గణాంకాల్లో అవసరమైనవి ఏమిటో తెలుసుకోవాలంటే ప్రామాణిక వార్తాపత్రికలు, నిపుణులు అందించే ముఖ్యాంశాలను చదవాలి.