ఐఐటీ మద్రాస్‌ గురించి తెలుసుకోవాలా?

ఐఐటీ మద్రాస్‌... దేశంలోనే ఉత్తమ విద్యాసంస్థగా ర్యాంకింగ్స్‌లో ఎప్పుడూ ముందుంటుంది. లక్షల మంది విద్యార్థులు అందులో చేరాలని ఆశపడుతూ ఉంటారు. ఈ క్రమంలో వారికి ఎన్నో సందేహాలు ఉండటం సహజం. ఆన్‌లైన్‌లో లభించే రకరకాలైన సమాచారంతో మరింత గందరగోళానికి గురికాకుండా... ఐఐటీ-మద్రాస్‌ పూర్వవిద్యార్థులు ఓ కొత్త ఆలోచనకు రూపునిచ్చారు. www.askiitm.com పేరుతో ఒక వెబ్‌సైట్‌ను ప్రారంభించారు. దీనిలో ఎవరైనా సరే, ఈ సంస్థకు సంబంధించిన ఏ విషయం గురించైనా ప్రశ్నలు అడగొచ్చు. వాటికి 48 గంటల్లోగా పూర్వవిద్యార్థులు జవాబులు ఇస్తారు. క్యాంపస్‌, ప్లేస్‌మెంట్స్‌, ఫ్యాకల్టీ, అకడమిక్స్‌... ఇలా దేని గురించైనా అభ్యర్థులు తమ సందేహాలు అడిగి నివృత్తి చేసుకోవచ్చు. అభ్యర్థులకు కచ్చితమైన సమాచారం తెలియాలనే ఆశయంతో దీన్ని ఏర్పాటు చేశారు. అంతేకాదు... జేఈఈ పరీక్షకు సన్నద్ధమవుతున్న వారికోసం సెప్టెంబర్‌ 2, 4 తేదీల్లో చెన్నై, హైదరాబాద్‌లో అవగాహన కార్యక్రమాలు నిర్వహిస్తున్నారు. అభ్యర్థులు దీనికి హాజరై పూర్వవిద్యార్థులు, డైరెక్టర్‌ను తమ ప్రశ్నలు నేరుగా అడగవచ్చు. అలాగే సెప్టెంబర్‌ 10, 11 తేదీల్లో క్యాంపస్‌ వర్చువల్‌ టూర్లు నిర్వహిస్తున్నారు. ఆసక్తిగల విద్యార్థులు ఈ అవకాశాన్ని ఉపయోగించుకోవచ్చు.