Online Course: ఆన్‌లైన్‌ కోర్సులకు విలువ ఉంటుందా?

మెకానికల్‌ ఇంజినీరింగ్‌ పూర్తిచేశాను. ఐటీ రంగంలో ఉద్యోగం చేయాలనుంది. ఆన్‌లైన్‌ డేటాసైన్స్‌ సర్టిఫికెట్‌ కోర్సులకు రెగ్యులర్‌ కోర్సులతో సమానంగా విలువ ఉంటుందా?

- వి.రమేష్‌

 డేటా సైన్స్‌ కోర్సును యూనివర్సిటీల్లో, కళాశాలల్లో రెగ్యులర్‌ డిగ్రీ/డిప్లొమా/సర్టిఫికెట్‌ కోర్సుగా అందించడం ఈమధ్య కాలంలోనే మొదలైంది. చాలా విద్యాసంస్థల్లో ఈ కోర్సును బోధించడానికి అవసరమైన అధ్యాపకుల కొరత ఇప్పటికీ ఉంది. ప్రస్తుతం చాలామంది ఈ కోర్సును ఆన్‌లైన్‌ పద్ధతిలోనే నేర్చుకొంటున్నారు. ప్రముఖ విద్యాసంస్థలనుంచి ఆన్‌   లైన్‌లో పొందే సర్టిఫికెట్‌లకు విలువ ఎక్కువగానే ఉంటుంది. రెగ్యులర్‌గా చదివినా, ఆన్‌లైన్‌లో చదివినా విషయపరిజ్ఞానం, సరైన నైపుణ్యాలు లేనట్లయితే ఆ సర్టిఫికెట్‌కు విలువ ఉండదు. మీకు అవకాశం ఉంటే అత్యుత్తమ విదేశీ యూనివర్సిటీలు, ఐఎస్‌బీ, ఐఐఎంలు, ఐఐటీల్లాంటి ప్రముఖ విద్యాసంస్థల్లో డేటా సైన్స్‌/ఎనలిటిక్స్‌ కోర్సును ఆఫ్‌లైన్‌/ ఆన్‌లై న్‌లో చేసే ప్రయత్నం చేయండి. డేటా సైన్స్‌/ ఎనలిటిక్స్‌ రంగాల్లో మెరుగైన ఉద్యోగం పొందాలంటే సర్టిఫికెట్‌తోపాటు అనుభవం కూడా ప్రధానం. మీరు కోర్సు నేర్చుకొంటూనే డేటా సైన్స్‌/ ఎనలిటిక్స్‌లో రకరకాల ప్రాజెక్టులు చేస్తూ అనుభవం, మెలకువలూ, నైపుణ్యాలను పొందండి: నచ్చిన సంస్థల్లో ఉద్యోగ ప్రయత్నాలు చేయండి.

- ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌