AP EAPCET: ఈఏపీసెట్‌ ఇంజినీరింగ్‌ విభాగం కీ విడుదల

అనంతపురం (జేఎన్‌టీయూ), న్యూస్‌టుడే: ఇంజినీరింగ్‌, అగ్రికల్చర్‌, ఫార్మసీ కోర్సుల ప్రవేశాలకు నిర్వహించిన ఈఏపీసెట్‌ పరీక్షలు మంగళవారంతో ముగిశాయి. ఇంజినీరింగ్‌ పరీక్షల ప్రాథమిక కీని విడుదల చేశామని, దీనిపై అభ్యంతరాలుంటే 26వ తేదీ ఉదయం 9 లోపు తెలపొచ్చని ఈఏపీసెట్‌ ఛైర్మన్‌ రంగజనార్ధన, కన్వీనర్‌ శోభాబిందు తెలిపారు. అగ్రికల్చర్‌, ఫార్మసీ పరీక్షల కీ 24వ తేదీ ఉదయం 11 గంటల నుంచి అందుబాటులో ఉంటుందని వెల్లడించారు. ప్రాథమిక కీ ఈఏపీసెట్‌ వెబ్‌సైట్‌లో అందుబాటులో ఉంది. ఈ నెల 15న మొదలైన ఈఏపీసెట్‌ పరీక్షలకు 93.38 శాతం మంది విద్యార్థులు హాజరయ్యారు. ఇంజినీరింగ్‌ విభాగంలో 2,24,724 మంది, ఫార్మసీ, అగ్రికల్చర్‌ విభాగాల్లో 90,573 మంది విద్యార్థులు పరీక్షలు రాశారు.