కరెంట్‌ అఫైర్స్‌

నమూనా ప్రశ్నలు

2023 సంవత్సరానికి గానూ ప్రతిష్ఠాత్మక లీప్‌జిగ్‌ బుక్‌ ప్రైజ్‌ను గెలుచుకున్న ప్రముఖ రష్యన్‌ రచయిత్రి ఎవరు? (ప్రస్తుతం ఈమె బెర్లిన్‌లో నివసిస్తున్నారు. ఈమె రాసిన ప్రముఖ పుస్తకం ‘ఇన్‌ మెమొరీ ఆఫ్‌ మెమొరీ’.)

జ: మరియా స్టెపనోవా

కేంద్ర శాస్త్ర సాంకేతిక మంత్రిత్వ శాఖ ఏ రాష్ట్రాల్లో పది అణు రియాక్టర్లను ఏర్పాటు చేయనున్నట్లు  ఇటీవల వెల్లడించింది? (ఈ పదిలో అత్యధికంగా నాలుగింటిని రాజస్థాన్‌లోని మాహి బన్స్వారా అణు విద్యుత్‌ కేంద్రంలో ఏర్పాటు చేయనున్నారు.)

జ: రాజస్థాన్‌, కర్ణాటక, హరియాణా, మధ్యప్రదేశ్‌

కేంద్ర వైద్య ఆరోగ్య కుటుంబ సంక్షేమశాఖ గణాంకాల ప్రకారం ప్రసవాల్లో సిజేరియన్‌ శస్త్ర చికిత్సల జాతీయ సగటు ఎంత శాతంగా ఉంది? (ఈ సగటు కంటే అధికంగా దేశంలోని 22 రాష్ట్రాలు, కేంద్రపాలిత ప్రాంతాల్లో ప్రసవ కోతలు జోరుగా సాగుతున్నాయి. ఆ జాబితాలో తెలంగాణ (54.09%), ఏపీ (42.15%) సైతం ఉన్నాయి. ప్రపంచ ఆరోగ్య సంస్థ నిర్దేశాల ప్రకారం మొత్తం ప్రసవాల్లో సిజేరియన్లు 10-15 శాతానికి మించకూడదు.) 

జ: 23.29 శాతం

సూక్ష్మ సేద్యం అమల్లో జాతీయ స్థాయిలో అగ్రస్థానంలో నిలిచిన రాష్ట్రం ఏది? (రెండు, మూడు, నాలుగు స్థానాల్లో వరుసగా గుజరాత్‌, మహారాష్ట్ర, ఆంధ్రప్రదేశ్‌ ఉన్నాయి.)

జ: రాజస్థాన్‌

ఆంధ్రప్రదేశ్‌లో క్రీడాకారులను గుర్తించడంతో పాటు యువతకు ఆరోగ్యకర జీవనశైలిపై అవగాహన కల్పించేలా ఏ కార్యక్రమం చేపట్టాలని రాష్ట్ర ప్రభుత్వం నిర్ణయించింది? (ఈ కార్యక్రమ నిర్వహణకు ప్రభుత్వ ప్రధాన కార్యదర్శి ఛైర్మన్‌గా, మరో 13 మంది మెంబర్లుగా రాష్ట్రస్థాయి అపెక్స్‌ కమిటీని ప్రభుత్వం ఏర్పాటుచేసింది. ఈ కమిటీ ద్వారా 17 ఏళ్లు పైబడిన క్రీడాకారులను గుర్తించి ప్రతిభను వెలికితీసేలా రాష్ట్ర  వ్యాప్తంగా క్రీడా టోర్నీలు నిర్వహిస్తారు.)

జ: ఆడుదాం ఆంధ్ర 2023 - 24