TTWREIS: అశోక్‌నగర్‌ సైనిక పాఠశాలలో ఆరు, ఇంటర్ ప్రవేశాలకు ఆహ్వానం

హైదరాబాద్‌: వరంగల్‌ జిల్లా అశోక్‌నగర్‌లో తెలంగాణ ట్రైబల్‌ వెల్ఫేర్‌ రెసిడెన్షియల్‌ సొసైటీ ఆధ్వర్యంలో ఏర్పాటు చేసిన సైనిక పాఠశాలలో అడ్మిషన్లకు నోటిఫికేషన్‌ విడుదలైంది.  ఎన్‌డీఏ, ఎస్‌ఎస్‌బీ తదితర సైనిక దళాల్లో ఉద్యోగాల కల్పనే లక్ష్యంగా శిక్షణ కల్పించేందుకు తెలంగాణ రాష్ట్ర ప్రభుత్వం గతంలో ఈ పాఠశాలను ప్రారంభించిన విషయం తెలిసిందే. బాలుర కోసం ప్రారంభించిన ఈ పాఠశాలలో  ప్రధానంగా సైనిక శిక్షణపైనే దృష్టిసారించనున్నారు. అయితే, వచ్చే విద్యా సంవత్సరానికి సంబంధించి  అశోక్‌నగర్‌లో బాలుర సైనిక స్కూల్‌ ఆరో తరగతి (సీబీఎస్‌ఈ), ఇంటర్మీడియట్‌(ఎంపీసీ- సీబీఎస్‌ఈ)లో ప్రవేశాలకు దరఖాస్తులు ఆహ్వానిస్తున్నారు.  ఒక్కో తరగతిలో 80 సీట్ల చొప్పున ఉండగా.. రాత పరీక్ష, శారీరక సామర్థ్యం, వైద్య పరీక్షల ఆధారంగా విద్యార్థులను ఎంపిక చేయనున్నారు.  ఆసక్తి కలిగిన విద్యార్థులు ఏప్రిల్‌ 8 లోపు ఆన్‌లైన్‌లో దరఖాస్తులు చేసుకోవాలి. ఏప్రిల్‌ 23న హాల్‌ టిక్కెట్లు డౌన్‌లోడ్‌, ఏప్రిల్‌ 30న ప్రవేశ పరీక్ష, మే 5న ఫలితాలు విడుదల (ఎస్‌ఎంఎస్‌/ఫోన్‌కాల్‌ ద్వారా) చేస్తారు. మే 8 నుంచి 13వరకు ఫిజికల్‌ ఫిట్‌నెస్‌ పరీక్షలు చేయనున్న అదికారులు.. జూన్‌ 12 నుంచి అడ్మిషన్ల ప్రక్రియను ప్రారంభించనున్నారు.