హయ్యో కృతీ.. ఎంత పని చేశావ్‌?

‘ఆహా ఏమి ఆ హొయలు.. ఆహా ఏమి ఆ డాన్స్‌? చించేశావ్‌ కృతీ..’ అంటూ అభిమానులు ‘పరమ్‌ పరమ్‌ పరమసుందరి...’ పాటను పదేపదే చూస్తూ ఎంజాయ్‌ చేస్తున్నారు. అందుకే ఈ పాట బ్లాక్‌బస్టర్‌ అయి కూర్చుంది. 27కోట్ల మంది యూట్యూబ్‌లో వీక్షించారు. కానీ ఇదేపాట ఓ కుర్రాడి చావుకొచ్చింది. తన పేరు పరమ్‌ఛాయ. ఎప్పుడైతే ఈ పాట బయటికొచ్చిందో అప్పట్నుంచి పాపం అతగాడ్ని పరమ్‌సుందరి అని ఆట పట్టించడం మొదలుపెట్టారట. ఈ గోల తట్టుకోలేక తను ‘కృతీ.. ఎందుకీ పాట చేశావ్‌? ఎందుకు నా జీవితాన్ని నాశనం చేశావ్‌? ఇప్పటికి నన్ను ఓ వెయ్యిసార్లు పరమ్‌సుందరి అని పిలిచారు. ఈ బాధ తట్టుకోలేకపోతున్నా’ అని ట్వీట్‌ చేశాడు. దానికి ‘ఊప్స్‌.. సారీ’ అని రీట్వీట్‌ చేసి ఫన్నీ ఎమోజీలు జత చేసింది కృతి. మనకు ఇదీ వార్తనే కదా!