belching: బ్రేవ్‌.. బ్రేవ్‌.. త్రేన్పులతో ఇబ్బందా?

కడుపులో పేరుకునే గ్యాస్‌తో ఎంతోమంది ఇబ్బంది పడుతుంటారు. సాధారణంగా నోటితో గాలిని పీల్చుకోవటం, ఆహారం జీర్ణమయ్యే సందర్భాల్లో కడుపులో గ్యాస్‌ పేరుకుపోతుంటుంది. ఇది బయటకు రావటానికి ప్రయత్నించటంతోనే త్రేన్పులు వస్తుంటాయి. కానీ, కొన్నిసార్లు ఈ గ్యాస్‌ జీర్ణాశయం, పేగుల్లోనే ఉండిపోయి కడుపు ఉబ్బరం, నొప్పికి దారి తీస్తుంది. తరచుగా త్రేన్పులు, ఆవలింతలతో చికాకు కలిగిస్తుంది. వీటి నుంచి తప్పించుకోవటానికి గ్యాస్‌ పేరుకుపోవటానికి గల కారణాలు, తగ్గించుకోవటానికి తీసుకోవాల్సిన జాగ్రత్తల గురించి తెలుసుకోవటం మంచిది.

🔥 కొవ్వు పదార్థాలు తినటం కడుపు ఉబ్బరానికి దోహదం చేస్తుంది. జీర్ణాశయం నుంచి ఆహారం త్వరగా పేగుల్లోకి వెళ్లకుండా కొవ్వు అడ్డుకుంటుంది. దీంతో కడుపు నిండుగా అనిపిస్తుంది.

🔥 ఒత్తిడి, ఆందోళన, పొగ తాగటం, జీర్ణకోశంలో ఇన్‌ఫెక్షన్‌, ఇరిటేబుల్‌ బోవెల్‌ సిండ్రోమ్‌ కూడా కడుపు ఉబ్బరానికి కారణమవుతాయి.

🔥 పిండి పదార్థాలు కూడా గ్యాస్‌ నిండేలా చేస్తాయి. ముఖ్యంగా క్యాబేజీ, కూల్‌డ్రింకులు, కాలీఫ్లవర్‌, బబుల్‌గమ్‌ వంటి వాటికి దూరంగా ఉండటం మంచిది.

🔥 ఆహారాన్ని గబగబా తినటం, మాట్లాడుతూ తినటం, కూల్‌డ్రింకులు తాగటం వల్ల జీర్ణాశయంలోకి గాలి ఎక్కువగా చేరుకుంటుంది. ఇది త్రేన్పులు రావటానికి దోహదం చేస్తుంది. కాబట్టి నెమ్మదిగా తినటం అలవాటు చేసుకోవాలి. కూల్‌డ్రింకులను స్ట్రాతో తాగటం మానెయ్యాలి.

🔥 పొగతాగటం మానెయ్యాలి. పొగతో పాటు గాలి కూడా లోనికి వెళ్తుందని మరవరాదు.

🔥 పాల పదార్థాలు, పండ్లు వంటి వాటిల్లోని చక్కెర (గ్లుటెన్‌) పూర్తిగా జీర్ణం కాకపోవటం వల్ల కూడా గ్యాస్‌ పేరుకుంటుంది. ఇలాంటివి గమనిస్తే సాధ్యమైనంత వరకు గ్యాస్‌కు కారణమవుతున్న పదార్థాలకు దూరంగా ఉండటం మంచిది.

🔥 కడుపు ఉబ్బరం, త్రేన్పులు చాలావరకు వాటంతట అవే తగ్గిపోతాయి. కానీ అతిసారం, మలబద్ధకం, వికారం, వాంతులు, బరువు తగ్గటం, కడుపు నొప్పి, తరచుగా గుండెలో మంట, మలంలో రక్తం పడటం, జ్వరం వంటి లక్షణాలు కనిపిస్తే వెంటనే డాక్టర్‌ని సంప్రదించాలి.