జుట్టంత బెంగ!

వెంట్రుకతో సమానమని గిట్టనివాళ్లను హేళన చేస్తుండొచ్చు గానీ అది రాలిపోతే తెలుస్తుంది దాని గొప్పతనమెంతో! తల మీద నిగనిగలాడుతూ.. సహజ కిరీటంలా భాసిల్లుతూ..  ముఖ సౌందర్యాన్ని ఇనుమడింపజేసే వెంట్రుకలు ఏదో పంతం పట్టినట్టుగా ఒక్కొక్కటీ ఊడి పడిపోతుంటే మనసులో రేగే కలవరం అంతా ఇంతా కాదు.
జుట్టెందుకు ఊడుతుందో? ఊడింది మళ్లీ వస్తుందో, రాదో? అని వగచే ‘బెంగ తలలు’ ఎన్నో.
చిట్కాలతో, మందులతో ఫలితం కనిపించక చివరికింతే అని సరిపెట్టుకునే ‘బోడి తలలు’ ఇంకెన్నో.
అపోహలతో, అవాస్తవాలతో సతమతమయ్యే ‘అనుమాన తలలు’ మరెన్నో.
అన్నింటికీ సమాధానం అందించే ప్రయత్నమే ఈ వారం సుఖీభవ కథనం.

మనకు నచ్చకపోయినా ఊడిపోవటం జుట్టు నైజం. మొలవటం ఎంత సహజమో, ఊడటమూ అంతే. నిజానికి ఎంతో కొంత రాలిపోవటమే మేలు. ఊడకుండా అలా పెరుగుతూ వస్తుంటే శుభ్రం చేసుకోవటం, దువ్వుకోవటం, ముడేసుకోవటం ఎంత కష్టమయ్యేదో! తల మీద నిరంతరం పెద్ద బరువును మోయాల్సి వచ్చేది. అదృష్టవశాత్తు ప్రకృతి మనకు అలాంటి ‘కష్టాలు’ పెట్టదలచుకోలేదు. కొన్ని వెంట్రుకలను కొంత కాలానికి రాలిపోయే ‘వరం’ ప్రసాదించింది! కాకపోతే అతిగా, అదేపనిగా రాలిపోవటమే కలవరం కలిగిస్తుంది. వెంట్రుకలు ఒక క్రమ పద్ధతిలో ఎదుగుతూ, ఆగుతూ, రాలిపోతూ వస్తుంటాయి. ఇది మూడు దశలుగా సాగుతుంది. 1. ఎదిగే (అనాజెన్‌) దశ. ఇది 3-6 ఏళ్ల పాటు కొనసాగుతుంది. ఇందులో వెంట్రుకల కుదుళ్లలోని కణాలు చాలా వేగంగా వృద్ధి చెందుతుంటాయి. 2. స్తబ్ధ (కెటాజెన్‌) దశ. సుమారు 2-3 వారాల పాటు సాగే ఇందులో వెంట్రుకలు పెరగటం ఆగిపోతుంది. ఏ సమయంలోనైనా మొత్తం వెంట్రుకల్లో దాదాపు 3% ఈ దశలో ఉంటాయి. 3. విశ్రాంతి (టిలోజెన్‌) దశ. ఇది దాదాపు 100 రోజుల వరకు కొనసాగుతుంది. వెంట్రుకలు రాలిపోయేది ఇందులోనే. సుమారు 6-8% జుట్టు ఈ దశలో ఉంటుంది. ఇదంతా ఒక చట్రంలా అత్యంత సహజంగా, నిరంతరంగా సాగిపోయే ప్రక్రియ. మగవారికి సుమారు లక్ష, ఆడవారికి లక్షన్నర వెంట్రుకలు ఉంటాయి. వీటిల్లో రోజుకు 50-100 వరకు వెంట్రుకలు రాలిపోతుంటాయి. ఒకవైపు రాలేవి రాలుతున్నా పెరిగేవి పెరుగుతుండటం వల్ల పెద్ద తేడా ఏమీ కనిపించదు. కొందరికి రోజూ కాకుండా వారానికి సరిపడా ఒకరోజే ఊడిపోవచ్చు. దీంతో ఏదో అయిపోయిందని, బట్టతల వచ్చేస్తోందని భయపడిపోతుంటారు. ఇలాంటి భయాలేవీ అవసరం లేదు. విశ్రాంతి దశ తర్వాత ఊడిపోయే వెంట్రుకలు తిరిగి మొలుస్తాయి. వెంట్రుకల ఎదుగుదల, విశ్రాంతి దశలు అస్తవ్యస్తమైతే మాత్రం జుట్టు ఎక్కువగా రాలిపోవటం మొదలెడుతుంది.