కాలుష్య భూతానికి భుజంగాసనం

ప్రస్తుతం వాయు కాలుష్యంతో పాటు శ్వాస సమస్యలూ పెరిగిపోతున్నాయి. వీటికి భుజంగాసనంతో కళ్లెం వేసుకోవచ్చు. ఎందుకంటే ఇది ఛాతీని, ఊపిరితిత్తులను బలోపేతం చేస్తుంది. అంతేకాదు, గుండెకూ బలాన్ని చేకూరుస్తుంది. పొట్టలోని కొవ్వును కరిగిస్తుంది. మలబద్ధకాన్ని నివారిస్తుంది. అయితే ఈ ఆసనాన్ని అల్సర్లు, హెర్నియా గలవారు, గర్భిణులు వేయకూడదు.

ఎలా చేయాలి?
బోర్లా పడుకొని శరీరం మొత్తాన్ని పూర్తిగా సాగదీయాలి. రెండు పాదాల వేళ్లు, మడమలు తాకేలా చూసుకోవాలి. అరచేతులను ఛాతీ పక్కలకు తీసుకొచ్చి, నేలకు ఆనించాలి. శ్వాసను తీసుకుంటూ నెమ్మదిగా తల, ఛాతీని పైకి లేపాలి. మోచేతులు నేలకు ఆని ఉండేలా చూసుకోవాలి. కొద్దిసేపయ్యాక శ్వాసను వదులుతూ తిరిగి మామూలు స్థితికి రావాలి.
ఇది అలవడిన తర్వాత మరింత ముందుకు సాగొచ్చు. ఈ దశలో ఛాతీకి దగ్గరగా అరచేతులను నేలకు ఆనించాలి. బలాన్ని చేతులపై మోపుతూ.. శ్వాసను తీసుకుంటూ తల, ఛాతీ, కడుపు భాగాన్ని పైకి లేపాలి. కొద్దిసేపు అలాగే ఉండి శ్వాసను వదులుతూ తిరిగి మామూలు స్థితికి రావాలి.