మనసు కుదురుగా

అప్పుడే ఉత్సాహం. అంతలోనే నిరుత్సాహం. ఇదో చిత్రమైన మానసిక స్థితి. దీన్నే బైపోలార్‌ డిజార్డర్‌ అంటారు. ఇలాంటివారికి కొవ్వు ఆమ్లాలతో కూడిన పదార్థాలను మార్చుకోవటం ఉపయోగపడగలదని పెన్‌ స్టేట్‌ కాలేజ్‌ ఆఫ్‌ మెడిసిన్‌ అధ్యయనం సూచిస్తోంది. ఆహారంలో ఒమేగా 6 కొవ్వు ఆమ్లాలతో కూడిన మాంసం, గుడ్లు, కొన్నిరకాల నూనెలను పరిమతంగా.. ఒమేగా 3 కొవ్వు ఆమ్లాలతో నిండిన టూనా, సాల్మన్‌ వంటి చేపలు.. అవిసె గింజలు అధికంగా తీసుకోవటం మేలు చేస్తున్నట్టు పరిశోధకులు గుర్తించారు. జీవక్రియల్లో పాలు పంచుకునే లాక్టిక్‌ యాసిడ్‌ వంటివి ఉత్పత్తి కావటానికి ఇలాంటి ఆహార పద్ధతి తోడ్పడుతున్నట్టు.. ఇవి మానసిక స్థితి మెరుగు పడటానికి దోహదం చేస్తున్నట్టు కనుగొన్నారు. ఇది చికిత్సకు ప్రత్యామ్నాయం కాకపోవచ్చు గానీ బైపోలార్‌ డిజార్డర్‌ లక్షణాలు అదుపులో ఉండటానికి ఉపయోగపడగలదని పరిశోధకులు సూచిస్తున్నారు.