పగటి వెలుగు రాత్రి నిద్ర!

రాత్రిపూట నిద్ర సరిగా పట్టటం లేదా? అయితే ఇంట్లో పగటిపూట వెలుతురు బాగా పడేలా చూసుకోండి. ఇది మన జీవగడియారం సజావుగా పనిచేయటానికి, నిద్ర బాగా పట్టటానికి, మానసిక ఆరోగ్యం మెరుగుపడటానికి సాయం చేస్తున్నట్టు ఇకాన్‌ స్కూల్‌ ఆఫ్‌ మెడిసిన్‌ అధ్యయనం పేర్కొంటోంది. పగటిపూట కిటికీలను మందమైన కర్టెన్లు, బ్లైండ్స్‌తో మూసి ఉంచితే ఒక వారంలోనే మెలటోనిన్‌ హార్మోన్‌ ఉత్పత్తి 15 నిమిషాలు ఆలస్యమవుతున్నట్టు.. ఇది నిద్ర ఆలస్యంగా పట్టటానికి, తక్కువసేపు నిద్రపోవటానికి దారితీస్తున్నట్టు పరిశోధకులు గుర్తించారు. అదే పగటి వెలుగు బాగా పడేలా చూసుకుంటే నిద్ర త్వరగా పట్టటంతో పాటు ఆందోళన, ఒత్తిడి కూడా తగ్గుతుండటం గమనార్హం. పగటి వెలుగు.. ముఖ్యంగా సహజ వెలుతురుతో విషయ గ్రహణ సామర్థ్యమూ పుంజుకుంటున్నట్టు గత అధ్యయనాలు పేర్కొంటున్నాయి.