ఇది టీకా దురదా?

సమస్య: కొవిడ్‌ మొదటి టీకా తీసుకున్నాక మా వదిన(31)కు ఒక సమస్య మొదలైంది. మాంసాహారం తిన్న ప్రతిసారి దురద వస్తోంది. ఇది ఇంతటితో ఆగిపోతుందా? ఇతరత్రా సమస్యలేవైనా వస్తాయా? రెండో మోతాదు టీకా వేయించుకోవచ్చా?

- బాలమణి, హైదరాబాద్‌

సలహా: కొవిడ్‌ టీకాకు మీరు చెబుతున్న సమస్యకు సంబంధం ఉండి ఉండకపోవచ్చు. ఒకవేళ టీకా దుష్ప్రభావమైతే తీసుకున్న వెంటనే  దురద వచ్చి ఉండాలి. మీ వదినకు మాంసాహారం తిన్నప్పుడే దురద వస్తోందని అంటున్నారు. దీనికి టీకాతో సంబంధం లేదనే అనిపిస్తోంది. టీకా దుష్ప్రభావాలైతే తీసుకున్న రెండు మూడు రోజుల వరకే ఉంటాయి.  ఇలా ఎక్కువ కాలం వేధించవు. కాబట్టి రెండో మోతాదు టీకా నిరభ్యంతరంగా ఇప్పించొచ్చు. ఒకవేళ మీకు అంత అనుమానంగా ఉన్నట్టయితే టీకా తీసుకునేందుకు వెళ్లినప్పుడు అక్కడి సిబ్బందికి ఈ విషయాన్ని ముందే చెప్పండి. టీకా ఇచ్చాక దురద వస్తుందేమో గమనిస్తారు. ఏదైనా సమస్య తలెత్తితే ముందుగానే తగు జాగ్రత్తలు తీసుకుంటారు.