కంటికి కాలుష్యం సెగ

వృద్ధాప్యంలో కంట్లోని రెటీనా మధ్యభాగం (మ్యాక్యులా) క్షీణించే సమస్యకు (ఏఎండీ) రకరకాల అంశాలు దోహదం చేస్తుంటాయి. వయసు, పొగ అలవాటు, కుటుంబంలో ఎవరికైనా ఏఎండీ ఉండటం వంటివన్నీ ఇందులో పాలు పంచుకునేవే. దీనికి వాతావరణ కాలుష్య ప్రభావమూ కారణమవుతున్నట్టు తాజా అధ్యయనం ఒకటి పేర్కొంటోంది. పరిశోధకులు ఎలాంటి కంటి సమస్యలు లేని 40-69 ఏళ్ల వయసువారిని ఆరేళ్ల పాటు పరిశీలించి ఈ విషయాన్ని గుర్తించారు. కాలుష్యం ఎక్కువగా ఉండే ప్రాంతాల్లో నివసించేవారికి మ్యాక్యులా క్షీణించే ముప్పు 8% ఎక్కువగా ఉంటుండటం గమనార్హం. వీరి కళ్లలో కొన్నిరకాల మార్పులు మరింత ఎక్కువగా కనిపిస్తున్నట్టు, ఇవి ఏఎండీకి దారితీస్తున్నట్టు కూడా తేలింది.