వ్యాయామంతో క్యాన్సర్‌ కట్టు

క్యాన్సర్‌ కేసులు, మరణాలు తగ్గటానికి క్రమం తప్పని వ్యాయామం ఎంతైనా అవసరమని తాజా అధ్యయనాలు పేర్కొంటున్నాయి. బలాన్ని పెంచే వ్యాయామాలతో (బస్కీలు, చేతుల మీద శరీర బరువు మోపటం, బరువులు ఎత్తటం వంటివి) క్యాన్సర్‌తో మరణించే ముప్పు 14% వరకు తగ్గుతున్నట్టు ఒక అధ్యయనం పేర్కొంటోంది. కండరాలను బలోపేతం చేసే వ్యాయామాలతో కిడ్నీ క్యాన్సర్‌ ముప్పు 26% వరకు తగ్గుతుండటం గమనార్హం. అయితే వీటికి ఏరోబిక్‌ వ్యాయామాలు (నడక, పరుగు, ఈత, సైకిల్‌ తొక్కటం వంటివి) కూడా తోడైతే క్యాన్సర్‌తో మరణించే ముప్పు 28% వరకు తగ్గుతున్నట్టు బయటపడింది. సుమారు 13 లక్షల మందిని 25 ఏళ్ల పాటు పరిశీలించిన 12 అధ్యయనాలను సమీక్షించి ఈ విషయాలను గుర్తించారు. క్యాన్సర్‌ బారినపడ్డవారిలో కణితుల వృద్ధిని నిలువరించటానికి వ్యాయామం తోడ్పడుతున్నట్టు మరో అధ్యయనం పేర్కొంటోంది. వ్యాయామం చేసినప్పుడు కండరాల నుంచి మయోకైన్స్‌ అనే ప్రొటీన్లు విడుదలవుతాయి. ఇవి రక్తం ద్వారా కణితులకు చేరుకొని అవి వృద్ధి కాకుండా అడ్డుకుంటాయి. క్యాన్సర్‌ కణాలతో పోరాడటంలో శరీరానికి తోడ్పడతాయి. మూడు నెలల పాటు వ్యాయామం చేసినవారిలో మయోకైన్స్‌ మోతాదులు పెరుగుతున్నట్టు, అదే సమయంలో ప్రోస్టేట్‌ క్యాన్సర్‌ కణాల వృద్ధి గణనీయంగా తగ్గుముఖం పట్టినట్టు తేలటం విశేషం. నిజానికి మయోకైన్స్‌ నేరుగా క్యాన్సర్‌ కణాలను చంపవు. కానీ వీటిపై దాడి చేసి, చంపేలా రోగనిరోధక కణాలకు సంకేతాలు అందిస్తాయని పరిశోధకులు పేర్కొంటున్నారు.