విటమిన్‌ మాత్రలు ఎవరికి?

బలం వస్తుందనే భావనతో కొందరు విటమిన్‌ మాత్రలు వేసేసుకుంటుంటారు. నిజానికివి ఆహారానికి ప్రత్యామ్నాయం కావు. ఆరోగ్యంగా ఉండి, రకరకాల ఆహార పదార్థాలు తినేవారికి వీటితో ఉపయోగముండదు. కానీ కొందరికి మాత్రం అవసరం.

* వృద్ధులకు: వయసు మీద పడుతున్నకొద్దీ ఆహారాన్ని నమలటంలో, మింగటంలో ఇబ్బంది తలెత్తొచ్చు. మొత్తంగా ఆహారమే సరిగా తీసుకోక పోవచ్చు. ఇది పోషణ లోపానికి దారితీస్తుంది. వీరికి విటమిన్ల మాత్రలు మేలు చేస్తాయి.
* గర్భిణులకు: ఎప్పుడు గర్భధారణ జరుగుతుందో తెలియదు. కాబట్టి సంతానాన్ని కనాలని అనుకునేవారు రోజూ ఫోలిక్‌ యాసిడ్‌తో కూడిన మాత్రలు వేసుకోవటం మంచిది. గర్భం ధరించిన తొలిరోజుల్లో ఫోలిక్‌ యాసిడ్‌ను తీసుకుంటే పిండంలో నాడీలోపాలు ఏర్పడకుండా చూసుకోవచ్చు.
* జీర్ణ సమస్యలు గలవారికి: సీలియాక్‌ డిసీజ్‌, అల్సరేటివ్‌ కొలైటిస్‌, సిస్టిక్‌ ఫైబ్రోసిస్‌ వంటి సమస్యలు జీర్ణక్రియను అస్తవ్యస్తం చేస్తాయి. ఇవి పోషణ లోపానికి దారితీస్తాయి. బరువు తగ్గటానికి చేసే బైపాస్‌ సర్జరీల వంటివీ దీనికి కారణం కావొచ్చు. వీరికి విటమిన్‌ మాత్రలు అవసరమవుతాయి.
* కొన్ని మందులు వేసుకునేవారికి: ఛాతీలో మంట, పులితేన్పులు తగ్గటానికి వేసుకునే ప్రొటాన్‌ పంప్‌ ఇన్‌హిబిటార్‌ రకం మందులు విటమిన్‌ బి12 సరిగా అందకుండా చేస్తాయి. కొన్ని పార్కిన్సన్స్‌ మందులూ * విటమిన్లను అడ్డుకుంటాయి. మూత్రం ఎక్కువగా వచ్చేలా చేస్తూ రక్తపోటు తగ్గటానికి తోడ్పడే మాత్రలతోనూ మెగ్నీషియం, పొటాషియం, క్యాల్షియం మోతాదులు తగ్గుతాయి. ఇలాంటివారికి విటమిన్‌ మాత్రలు ఆయా పోషకాలు భర్తీ కావటంలో తోడ్పడతాయి.
* జబ్బుల నుంచి కోలుకునేవారికి: జ్వరం, ఇన్‌ఫెక్షన్ల వంటి జబ్బుల నుంచి కోలుకుంటున్నవారికీ మాత్రలు అవసరమవ్వచ్చు.