ప్రశాంతంగా..

ఏదైనా సమస్యతో డాక్టర్‌ దగ్గరికి వెళ్లినప్పుడు ఒకింత ఆందోళన కలగటం సహజమే. డాక్టర్‌ ఏం చెబుతారో? ఏమవుతుందో? అని చాలామంది భయపడుతూనే ఉంటారు. మామూలు జలుబు, జ్వరం లాంటి జబ్బులైతే పెద్దగా ఇబ్బంది ఉండకపోవచ్చు గానీ తీవ్ర సమస్యల విషయంలో ఇంకాస్త ఎక్కువ ఆందోళన కలుగుతుంది. ఇది డాక్టర్‌ చెప్పే విషయాల మీద అంతగా దృష్టి పెట్టకపోవటానికి దారితీయొచ్చు. దీంతో మందులు సరైన మోతాదులో, సరైన సమయానికి వేసుకోకపోవచ్చు. చెప్పిన జాగ్రత్తలు పాటించకపోవచ్చు. అందువల్ల డాక్టర్‌ గదిలోకి వెళ్లే ముందు మనసును కాస్త ప్రశాంతంగా ఉంచుకోవటం చాలా ముఖ్యం. ఓ తాజా అధ్యయనంలో ఇదే బయటపడింది. ఫ్లూ, క్యాన్సర్‌, హెచ్‌ఐవీ, హెర్పిస్‌ చికిత్సల కోసం వచ్చిన వారిలో మానసిక ప్రశాంతతను చేకూర్చే పనులు చేసినవారు డాక్టర్‌ చెప్పిన విషయాలను బాగా గ్రహించినట్టు తేలింది. గాఢంగా శ్వాస తీసుకోవటం, మనసుకు నచ్చిన సంగీతాన్ని వినటం వంటివీ మానసిక ప్రశాంతత చేకూరుస్తాయి. డాక్టర్‌ గదిలోకి వెళ్లేముందు ఇలాంటి తేలికైన పద్ధతులను పాటించొచ్చు. వెంట స్నేహితుడినో, కుటుంబ సభ్యులనో తీసుకెళ్తే ఇంకా మంచిది. డాక్టర్‌ చెప్పే విషయాలను గుర్తుపెట్టుకోవటానికి వీలుంటుంది.