వ్యాయామమూ అవసరమే

అధిక బరువు నియంత్రణ అనగానే అంతా సూచించేది తక్కువ కేలరీలతో కూడిన ఆహారం తినమనే. అయితే అందరికీ ఒకే సూత్రం పనికిరాదని, ఆయా వ్యక్తులను బట్టి బరువు తగ్గించే పద్ధతులు పాటించాలని యూనివర్సిటీ ఆఫ్‌ ఒటావా అధ్యయనం పేర్కొంటోంది. ఆహార పద్ధతులతో బరువు తగ్గని ఊబకాయుల విషయంలో వ్యాయామానికి అధిక ప్రాధాన్యం ఇవ్వాలని సూచిస్తోంది. వ్యాయామంతో కొవ్వు మోతాదు తగ్గుతుంది. ఎముకలకు అంటుకొని ఉండే కండరాల జీవక్రియా పుంజుకుంటుంది. దీంతో బరువు తగ్గే అవకాశాలూ మెరుగవుతున్నాయని పరిశోధకులు చెబుతున్నారు. సాధారణంగా తిండి తగ్గించినా బరువు తగ్గకపోతే ఆహార నియమాలు సరిగా పాటించటం లేదనే నిందిస్తుంటారు. ఇది ఊబకాయులను మరింత ఆందోళనకు గురిచేస్తుంటుంది. వీరి విషయంలో చికిత్సల తీరును మార్చుకోవాల్సిన అవసరముందని అధ్యయన ఫలితాలు చెబుతున్నాయి. కేలరీలు తగ్గించటమే సరిపోదని, వ్యాయామమూ కీలకమేనని సూచిస్తున్నాయి.