ఈ జాగ్రత్తలు పాటించండి

‘కొవాగ్జిన్‌’ టీకాపై భారత్‌ బయోటెక్‌ సూచనలు

ఈనాడు, హైదరాబాద్‌: జ్వరం, అలర్జీలు, రక్తస్రావం.. వంటి ఆరోగ్య సమస్యలుంటే ‘కొవాగ్జిన్‌’ టీకా తీసుకోవద్దని భారత్‌ బయోటెక్‌ స్పష్టం చేసింది. టీకా తీసుకునే వారికి/ టీకా ఇచ్చే వారికి కొన్ని మార్గదర్శకాలతో కూడిన ఒక ‘ఫ్యాక్ట్‌ షీట్‌’ను తాజాగా కంపెనీ విడుదల చేసింది. గర్భిణులు, పాలిచ్చే తల్లులపై ఈ టీకా ప్రభావాన్ని ఇంకా పరిశీలించలేదని, కాబట్టి అటువంటి వారు కూడా ప్రస్తుతానికి టీకా తీసుకోకపోవటం మేలని వివరించింది. ‘కొవాగ్జిన్‌’ టీకా మొదటి-రెండో దశ క్లినికల్‌ పరీక్షల్లో ఎంతో మెరుగైన ఫలితాలు లభించాయని, యాంటీబాడీలు వృద్ధి చెందడానికి ఈ టీకా వీలు కల్పిస్తోందని స్పష్టమైనట్లు భారత్‌ బయోటెక్‌ పేర్కొంది. దీనిపై మూడో దశ క్లినికల్‌ పరీక్షలు ఇంకా జరుగుతున్నాయని, ఆ పరీక్షల ఫలితాలన్నీ వచ్చాక ‘క్లినికల్‌ ఎఫికసీ’ (సామర్థ్యం) నిర్ధారణ అవుతుందని వివరించింది. ఇన్‌-యాక్టివేటెడ్‌ సార్స్‌ కోవ్‌-2 వైరస్‌ను ఉపయోగించి ‘కొవాగ్జిన్‌’ టీకా తయారు చేసినట్లు తెలియజేసింది. నాలుగు వారాల వ్యవధిలో రెండు డోసులుగా ఈ టీకా తీసుకుంటే ఫలితం ఉంటుందని వెల్లడించింది.
తీవ్ర సైడ్‌ ఎఫెÆక్టులు ఉండవు
టీకా తీసుకున్న తర్వాత కొన్ని ‘సైడ్‌ ఎఫెక్టులు’ కనిపించవచ్చని పేర్కొంది. ఇంజెక్షన్‌ చేసిన చోట నొప్పి, వాపు, దురదతో పాటు తలనొప్పి- జ్వరం రావచ్చని, నీరసంగా ఉండటం, వాంతులు కావటం.. కూడా కనిపిస్తాయని తెలిపింది. కొవాగ్జిన్‌ టీకావల్ల తీవ్రమైన ‘అలర్జిటిక్‌ రియాక్షన్‌’ కనిపించే అవకాశాలు లేవని స్పష్టం చేసింది.