దంతాలకులావు హాని

పళ్లు దృఢంగా ఉండాలని కోరుకుంటున్నారా? అయితే ఊబకాయం బారినపడకుండా చూసుకోండి. ఈ రెండింటికీ బలమైన సంబంధమే ఉంటున్నట్టు తాజా అధ్యయనం పేర్కొంటోంది. ఊబకాయంతో మధుమేహం, గుండెజబ్బుల వంటి రకరకాల సమస్యలు చుట్టుముడతాయన్నది తెలిసిందే. ఇది దంతాలనూ వదిలి పెట్టటం లేదని యూనివర్సిటీ ఎట్‌ బఫెలో శాస్త్రవేత్తలు గుర్తించారు. ఊబకాయంతో శరీరంలో కణస్థాయిలో వాపు ప్రక్రియ (ఇన్‌ఫ్లమేషన్‌) తలెత్తుతుంది. ఇది దీర్ఘకాలం కొనసాగుతూ వస్తుంది కూడా. దీని మూలంగా పుట్టుకొచ్చే మైలాయిడ్‌ డిరైవ్‌డ్‌ సప్రెసర్‌ కణాలు (ఎండీఎస్‌సీ) ఎముక కణజాలాన్ని దెబ్బతీసేలా చేస్తున్నట్టు పరిశోధకులు గుర్తించారు. దంతాలకు చిగుళ్ల వ్యాధి పెద్ద శత్రువు. ఇది దంతాలకు దన్నుగా నిలిచే ఎముకను, కణజాలాన్ని దెబ్బతీస్తుంది. ఇలా దంతాలు ఊడిపోవటానికి చిగుళ్ల జబ్బు పెద్ద కారణంగా నిలుస్తోందన్నమాట. మైలాయిడ్‌ డిరైవ్‌డ్‌ సప్రెసర్‌ కణాలు ఎముక మజ్జ నుంచి పుట్టుకొస్తాయి. తర్వాత ఎముక ఏర్పడటాన్ని అడ్డుకునే కణాలుగా (ఆస్టియోక్లాస్ట్స్‌) మారతాయి. ఇవి ఎముక క్షీణించే ముప్పు పెరిగేలా చేస్తాయి. ఊబకాయుల్లో ఇది మరింత ఎక్కువగా కనిపిస్తుండటం గమనార్హం. ఊబకాయం మూలంగా ఎండీఎస్‌సీ మోతాదులు పెరుగుతున్నట్టు శాస్త్రవేత్తలు గుర్తించారు. ఊబకాయుల్లో ఆస్టియోక్లాస్ట్స్‌తో ముడిపడిన 27 జన్యువులు సైతం ఎక్కువగా వ్యక్తీకరణ అవుతున్నట్టూ కనుగొన్నారు.

• Telugu news
• Teeth
• Obesity
• Diabetes
• Inflamation
• Eenadu
• Health news
• Sukhibhava page