మధుమేహానికి ముందే!

మధుమేహం పెద్ద సమస్య. మనదేశంలో సుమారు 7.5 కోట్ల మంది దీంతో బాధ పడుతున్నారని అంచనా. దీని చికిత్స కోసం ప్రతి సంవత్సరం ఒకొకరు దాదాపు 9వేల రూపాయలు ఖర్చు పెడుతున్నారు. సమస్య తీవ్రమై.. రక్తనాళాలు, గుండె, కిడ్నీల వంటి కీలక అవయవాలు విఫలమై ఏటా 6.5 లక్షల మంది మృత్యువాత పడుతున్నారు. అధిక బరువు (శరీర ఎత్తు, బరువుల నిష్పత్తి 23 కన్నా ఎక్కువ).. వయసు (నలబై ఏళ్లు దాటినవారికి).. సన్నిహిత కుటుంబ సభ్యుల్లో మధుమేహం ఉండటం.. వ్యాయామం, శారీరక శ్రమ అంతగా చేయకపోవటం.. అధిక రక్తపోటు.. రక్తంలో కొవ్వు పదార్థం (ట్రైగ్లిజరైడ్లు) ఎక్కువగా ఉండటం.. మహిళల్లో గర్భధారణ సమయంలో మధుమేహం రావటం.. తేలికగా జీర్ణమయ్యే పిండి పదార్థాలు ఎక్కువగా తినటం.. మానసిక ఒత్తిడి వంటివి ముప్పు పెరిగేలా చేస్తాయి. వయసు, కుటుంబ చరిత్ర మన చేతుల్లో లేకపోవచ్చు గానీ ఆహారం, శారీరక శ్రమ వంటి వాటి విషయంలో ముందు నుంచే జాగ్రత్తపడితే మధుమేహాన్ని చాలావరకు నివారించుకోవచ్చు.