కిడ్నీలకు పురుగు మందు దెబ్బ

పంటలకు పురుగుమందులు కొడుతున్నారా? కాస్త జాగ్రత్త. మలాథియాన్‌ అనే మందుతో దీర్ఘకాల కిడ్నీ జబ్బు (సీకేడీ) ముప్పు పెరుగుతున్నట్టు యూనివర్సిటీ ఆఫ్‌ క్వీన్స్‌లాండ్‌ పరిశోధకులు గుర్తించారు. దీర్ఘకాల కిడ్నీ జబ్బుకు వయసు మీద పడటం, అధిక రక్తపోటు, మధుమేహం వంటి సమస్యలు దోహదం చేస్తుంటాయి. అయితే చాలామందిలో కారణాలేవీ లేకుండానూ దీని ముప్పు పెరుగుతుండటంతో పరిశోధకులు వివిధ అంశాలపై ఆరా తీశారు. మొదట్లో పొలాలు, చెలకల్లో వేడికి గురికావటం, ఒంట్లో నీటి శాతం తగ్గటం, పురుగు మందులు చల్లటం, భార లోహాలు, వ్యవసాయ రసాయనాలు సీకేడీకి కారణమవుతుండొచ్చని అనుమానించారు. అయితే పురుగుమందుల అవశేషాలు, భార లోహాలతో కూడిన మూలిక ఔషధాలు సైతం దోహదం చేస్తున్నట్టు గుర్తించారు. కారణమేంటన్నది తెలియరాలేదు కానీ పీపీఈ కిట్ల వంటివి ధరించకుండా పురుగుమందులు చల్లటం, వీటి అవశేషాలతో కూడిన మట్టిలో పనిచేయటం దోహదం చేస్తుండొచ్చని భావిస్తున్నారు. అందువల్ల పురుగుమందుల ప్రభావానికి గురికాకుండా చూసుకోవటం ముఖ్యమని పరిశోధకులు సూచిస్తున్నారు. స్వల్పంగా వీటి ప్రభావానికి గురైనా దీర్ఘకాలంలో విపరీత ఫలితం కనిపించొచ్చని హెచ్చరిస్తున్నారు. పొలాల్లో మలాథియాన్‌ విరివిగా చల్లుతుంటారు. దోమల నివారణకు బహిరంగ ప్రాంతాల్లోనూ దీన్ని ఉపయోగిస్తుంటారు.