అరికాలు నొప్పా?

కొందరికి ఉదయం పూట పాదాన్ని నేల మీద మోపగానే విపరీతమైన నొప్పి పుడుతుంటుంది. దీనికి ప్రధాన కారణం పాదం అడుగున వేళ్లు, మడమ ఎముకతో కలిసి ఉండే దృఢమైన కణజాలం వాయటం. దీన్నే ప్లాంటార్‌ ఫేషియైటిస్‌ అంటారు. దీనికి కారణమేంటన్నది కచ్చితంగా తెలియదు. వయసు, కొన్నిరకాల వ్యాయామాలు, పాదం అడుగు భాగం సమతలంగా ఉండటం లేదా పాదం మధ్యలో ఒంపు మరీ ఎత్తుగా ఉండటం వంటివి దోహదం చేస్తుంటాయి. గర్భధారణ సమయంలో బరువు పెరగటం, సరైన షూ వేసుకోకపోవటం వల్ల మగవారికన్నా మహిళలకు దీని ముప్పు మరింత ఎక్కువ. కొన్ని జాగ్రత్తలు తీసుకోవటం ద్వారా ప్లాంటార్‌ ఫేషియైటిస్‌ను నివారించుకోవచ్చు.
* బరువు అదుపులో ఉంటే పాదం మీద తక్కువ భారం పడుతుంది. కాబట్టి బరువు అదుపులో ఉంచుకోవాలి.
* పాదాల మధ్య ఒంపునకు మంచి దన్ను కల్పించే, మెత్తటి షూ, చెప్పులు ధరించాలి.
* పరుగెత్తటం, నడవటం వంటి వ్యాయామాలు చేసేవారు ముందుగా పాదాలను కాస్త సాగదీసే సన్నద్ధ వ్యాయామాలు చేయాలి. వీలైతే పాదం మీద ఎక్కువ భారం పడకుండా చూసే ఈత, సైకిల్‌ తొక్కటం వంటివి ఎంచుకోవచ్చు.