Published : 31 Jan 2017 01:37 IST

వారాంతాల్లోనైనా మేలే!

వ్యాయామం
వారాంతాల్లోనైనా మేలే!

వ్యాయామం శరీర సామర్థ్యాన్ని పెంపొందిస్తుంది. రోగనిరోధకశక్తిని బలోపేతం చేస్తుంది. మధుమేహం, అధిక రక్తపోటు, క్యాన్సర్‌ వంటి రకరకాల జబ్బుల బారినపడకుండా కాపాడుతుంది. అందుకే రోజూ కనీసం 30 నిమిషాల సేపు వ్యాయామం చేయాలన్నది నిపుణుల సూచన. అయితే పని ఒత్తిళ్ల మూలంగానో, ఇతరత్రా కారణాలతోనో చాలామందికి రోజూ వ్యాయామం చేయటం కుదరకపోవచ్చు. అంతమాత్రాన దిగాలు పడాల్సిన అవసరం లేదని తాజా అధ్యయనం భరోసా ఇస్తోంది. వారాంతాల్లో వ్యాయామం చేసినా మంచిదేనని చెబుతోంది. వారంలో రెండు మూడు సార్లు తీవ్రంగా 75 నిమిషాల సేపు.. లేదంటే ఒక మాదిరిగా 150 నిమిషాల సేపు వ్యాయామం చేసినవారికి మరణం ముప్పు తగ్గుతున్నట్టు తేలటం గమనార్హం. ఇలాంటి ‘వారాంత యోధులకు’ అన్ని రకాల కారణాలతో సంభవించే మరణం ముప్పు 30% తగ్గుతుండగా.. క్యాన్సర్‌ మరణం ముప్పు 18%, గుండెజబ్బు మరణాల ముప్పు 40% తగ్గుతుండటం విశేషం. కేవలం సెలవు దినాల్లోనే జిమ్‌లకు వెళ్లేవారికి ఇది నిజంగా శుభవార్తే. ఒక వారానికి చేయాల్సినంత వ్యాయామం చేయకపోయినా ఆరోగ్య ముప్పులు గణనీయంగా తగ్గుతుండటం ఆసక్తికరం. అసలు ఏమాత్రం వ్యాయామం చేయకపోవటం కన్నా ఎంతో కొంత శారీరకశ్రమ, వ్యాయామం చేయటం మేలని ఫలితాలు సూచిస్తున్నాయని నిపుణులు చెబుతున్నారు.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

చదువు