Pleasant thought: ఆహ్లాద ఊహలతో మంచి ఆలోచనలు

మనమంతా అప్పుడప్పుడూ విచారకర సందర్భాలను ఎదుర్కొంటూనే ఉంటాం. ప్రతికూల ఆలోచనలతో సతమతమవుతూనే ఉంటాం. యుక్తవయసు పిల్లలకు పదే పదే ఇలాంటి ఆలోచనలు వచ్చే అవకాశం ఎక్కువ. వాటి గురించే ఆలోచిస్తూ గడుపుతుంటారు. అయితే ఆనందకరమైన సంఘటనలను ఊహించుకుంటే ప్రతికూల ఆలోచనల పరంపర నుంచి బయటపడొచ్చని అమెరికాలోని ఓరేగాన్‌ స్టేట్‌ యూనివర్సిటీ అధ్యయనంలో బయటపడింది. కొద్దిసేపు వీటి నుంచి ధ్యాస మళ్లితే స్నేహితులు, తల్లిదండ్రులు, డాక్టర్‌ సలహా తీసుకోవటానికి అవకాశం చిక్కుతుందని పరిశోధకులు వివరిస్తున్నారు. గతంలో జరిగిన దుర్ఘటనలకు సంబంధించిన ఆలోచనల్లో మునిగినప్పుడు మనసు మరింత విచారంతో నిండిపోతుంది. భావోద్వేగాలను, శరీరాన్ని నియంత్రించుకోవటం కష్టమవుతుంది. ఇలాంటి ఆలోచనల నుంచి బయటపడేసే తేలికైన మార్గాలను గుర్తించటంపై పరిశోధకులు దృష్టి సారించారు. ఆహ్లాదకరమైన సంఘటనలను, ఇష్టమైన వ్యక్తులను ఊహించుకోవటం ఇందుకు బాగా ఉపయోగపడుతున్నట్టు తేలింది. ఇది ప్రతికూల ఆలోచనల నుంచి మనసు మళ్లేలా చేయటమే కాదు, నాడీ వ్యవస్థనూ కుదుట పరుస్తున్నట్టు బయటపడింది. మనసులో ఊహించు కోవటానికి లోతుగా ఆలోచించాల్సి వస్తుంది. ఇందుకు మరింత ఎక్కువ ప్రయత్నం చేయాల్సి ఉంటుంది. ఫలితంగా బలమైన భావోద్వేగాల ప్రతిస్పందనలు పుట్టుకొస్తాయి. దీంతో ప్రతికూల ఆలోచనల నుంచి మనసు మళ్లటానికి వీలు కల్పిస్తుందని పరిశోధకులు భావిస్తున్నారు.