భలే... భలే... అద్భుత పక్షి!

హాయ్‌ ఫ్రెండ్స్‌... ఈ రోజు మనం ఓ సముద్ర పక్షి గురించి తెలుసుకుందాం సరేనా! మరింకెందుకాలస్యం.. చకచకా ఈ కథనం చదివేయండి.

ఈ పక్షి పేరు మ్యాగ్నిఫిసెంట్‌ ఫ్రిగేట్‌. దీని పేరులో ఉన్నట్లే ఇది నిజంగా ఓ అద్భుత పక్షి. ఫ్రెగటిడే కుటుంబంలో ఇదే పెద్దది. ఈ పక్షి 89 నుంచి 114 సెంటీమీటర్ల వరకు పొడవు ఉంటుంది. రెక్కల వెడల్పేమో 2.17 నుంచి 2.44 మీటర్ల వరకు ఉంటుంది. అంటే చాలా పొడవైన రెక్కలన్నమాట. రెక్కలైతే పొడవుంటాయి కానీ, వెడల్పు మాత్రం పెద్దగా ఉండదు. అంటే ఈ పక్షి రెక్కలు పొడవుగా, సన్నగా ఉంటాయన్నమాట. బరువేమో 1.1 నుంచి 1.59 కిలోగ్రాముల వరకు తూగుతాయి.

ఎర్ర సంచి.... ఎంతో అందం..

ఈ పక్షులు మెక్సికో, పెరూ.. ఫ్లోరిడా, బ్రెజిల్‌ తీరాల మధ్య ఎక్కువగా కనిపిస్తుంటాయి. వీటిలో మగవాటికి గొంతు కింద ఎర్రటి సంచిలాంటి నిర్మాణం ఉంటుంది. ఆడ పక్షులకు ఇది ఉండదు. మగపక్షుల కన్నా... ఆడ పక్షులు పరిమాణంలో కాస్త పెద్దగా ఉంటాయి. ఈ పక్షులు నలుపు రంగులో ఉంటే... వీటి పిల్లలు మాత్రం తెలుపు రంగులో ఉంటాయి.

కాళ్లకు నీళ్లంటకుండా...!

ఈ మ్యాగ్నిఫిసెంట్‌ ఫ్రిగెట్‌లు చేపల్ని ఇష్టంగా తింటాయి. ముఖ్యంగా ఎగిరే చేపలంటే వీటికి భలే ఇష్టం. అవి సముద్ర జలాల మీద ఎగురుతుంటే ఈ పక్షులు వాటిని గాల్లోనే పట్టుకుని గుటుక్కుమనిపిస్తాయి. ఇంకా చిన్న చిన్న ట్యూనా చేపల్ని కూడా ఇష్టంగా తింటాయి. సాధ్యమైనంత వరకు ఈ పక్షులు నీటిలోకి దూకకుండానే పై నుంచే చేపల్ని పట్టుకునే ప్రయత్నం చేస్తాయి. గాల్లోనే వాటిని తినేస్తాయి. చాలా వేగంగా ఎగిరే నైపుణ్యమే వీటికి వేటలో సాయపడుతుంది. నేస్తాలూ! మొత్తానికి ఇవీ ఈ అద్భుత పక్షి విశేషాలు. ఈ సంగతులన్నీ భలే ఉన్నాయి కదూ!