పర్పుల్‌ కొండపై పచ్చల దండ!

చుట్టూ పచ్చని చెట్లు... మధ్యలో అందమైన భవనం... అచ్చం పచ్చల పేరులో పొదిగిన రత్నంలా ఉంటుందది... ఇంతకీ ఏంటది? దాని సంగతులేంటి?

* తూర్పు చైనాలో నాన్‌జింగ్‌ అనే ఓ నగరం ఉంది. దీనికి ఆరు కిలోమీటర్ల దూరంలో అందమైన జోంగ్షాన్‌ పర్వతం. దానిపై ఎన్నో ఆకర్షణలు ఉన్నాయి. వాటిలో ప్రత్యేకమైంది ఏంటో తెలుసా? మీలింగ్‌ ప్యాలెస్‌. ఎందుకంటే చుట్టూ హారంగా పెరిగిన చెట్ల మధ్యలో.. లాకెట్‌లా ఈ భవనం భలేగా కనిపిస్తుంది. రుతువులు మారినప్పుడు కొన్ని చెట్ల ఆకుల రంగులూ మారతాయి! అలా ఈ భవన పరిసరాలు ఓసారి పచ్చలహారంగా.. ఇంకోసారి కెంపు సొంపులతో అలరిస్తాయి. రాత్రి వేళలో విద్యుద్దీపకాంతుల మధ్య ఈ ప్రాంతమంతా బంగారు వడ్డాణంలా మెరిసిపోతుంది.

* ఇంతకీ దీన్ని ఎవరు? ఎప్పుడు? కట్టారంటే.. 1931-34 మధ్యకాలంలో చైనా మాజీ అధ్యక్షుడు చియాంగ్‌ కై-షేక్‌ తన భార్య సూంగ్‌ మీలింగ్‌కు ప్రేమ కానుకగా కట్టించాడట. అందుకే దీన్ని ప్రేమ సౌధంగా పిలుస్తుంటారు.

* ప్యాలెస్‌ రెండు అంతస్తులతో ఉంటుంది. మీలింగ్‌ పుట్టిన రోజు మార్చి 4ను ప్రతిబింబించేలా 34 పాలరాతి స్తంభాలతో భవన నిర్మాణం చేశారు. ప్రతి స్తంభంపై అందమైన చిత్రాకృతులు కనిపిస్తాయి.

* పైకప్పును ఆకుపచ్చ రంగు టైల్స్‌తో, వాటిపై కనువిందు చేసేలా హంసల చిత్రాల్ని తీర్చిదిద్దారు.

* పైకి ఈ భవనం చైనా నిర్మాణ శైలిలో కనిపించినా.. లోపల విదేశీ వైభవం దర్శనమిస్తుంది. బల్లలు, సోఫాలు, షాండ్లియర్లు, మంచాలు ఖరీదైన వస్తువులు... ఇలా అన్నీ విదేశాల నుంచి తెప్పించినవే.

* చియాంగ్‌ దంపతులు సెలవుల్లో, ప్రత్యేక సందర్భాల్లో మీలింగ్‌ ప్యాలెస్‌కు వచ్చేవారట. 1949లో చైనా అంతర్యుద్ధం ముగిసే సమయంలో వీరిద్దరూ ప్యాలెస్‌ వదిలి తైవాన్‌కు వలస వెళ్లారు. ఈ భవనం మాత్రం మీలింగ్‌ ప్యాలెస్‌గానే నిలిచిపోయింది. ఇక్కడి ప్రభుత్వం దీన్ని స్వాధీనం చేసుకుని జోంగ్షాన్‌ నేషనల్‌ పార్క్‌కు అప్పగించింది. చాలా కాలం ఈ భవనం ఖాళీగా ఉంది.

* కొన్ని సంవత్సరాల కిందట ఈ ప్యాలెస్‌కు మరిన్ని హంగులు అద్ది సందర్శక ప్రాంతంగా మార్చారు. అప్పటి నుంచి వేలాదిగా పర్యటకులు వస్తున్నారు.

* మీలింగ్‌ ప్యాలెస్‌ ఉన్న జోంగ్షాన్‌ హిల్‌కి మరో పేరు పర్పుల్‌ పర్వతం. సూర్యాస్తమయ సమయంలో ఈ కొండపై మేఘాలు ఎరుపు, నీలం కలిసిన రంగులో మెరిసిపోతూ దర్శనమిస్తాయట. అందుకే దీనికా పేరు వచ్చింది.