ఏటా సగం భూగోళం చుట్టేస్తాం!

నన్ను చూడగానే మీకు ‘చిట్టి చిలుకమ్మా.. అమ్మ కొట్టిందా.. తోటకెళ్లావా.. పండు తెచ్చావా..’ పాట గుర్తుకు వస్తే.. మీరు పప్పులో కాలేసినట్లే! ఎందుకంటే నేను చిలుకను కాదు ఓ బుల్లి డేగను.. మరి!

Updated : 24 Feb 2020 00:09 IST

జీవితం

 

నన్ను చూడగానే మీకు ‘చిట్టి చిలుకమ్మా.. అమ్మ కొట్టిందా.. తోటకెళ్లావా.. పండు తెచ్చావా..’ పాట గుర్తుకు వస్తే.. మీరు పప్పులో కాలేసినట్లే! ఎందుకంటే నేను చిలుకను కాదు ఓ బుల్లి డేగను.. మరి!

నా పేరు. అముర్‌ ఫాల్కన్‌

* నేను ఎక్కువగా దక్షిణ సైబీరియా, ఉత్తర చైనాలో కనిపిస్తుంటా.

* చూస్తే చిలుకలా.. పరిమాణంలో చిన్నసైజు పావురంలా ఉంటాను కానీ.. నేను ఏటా దాదాపు సగం భూగోళం చుట్టేస్తాను తెలుసా?!

* శీతాకాలంలో చలి నుంచి తప్పించుకోవడానికే మేం ఇలా చేస్తాం.

* మేం చలికాలానికి ముందే పెద్ద పెద్ద గుంపులుగా ముందుగా భారతదేశంలోని నాగాలాండ్‌లోకి ప్రవేశిస్తాం.

ఉండి పోం.. ఉండి.. పోతామంతే!●

* నాగాలాండ్‌కు చేరుకున్న తర్వాత మేం అక్కడే ఉండిపోం. కేవలం రెండు వారాలు మాత్రమే ఉండి సేదతీరి పోతామంతే!.

* తర్వాత అటు నుంచి శ్రీలంక, హిందూ మహాసముద్రం మీదుగా ఆఫ్రికాలోని డ్రాకన్స్‌బర్గ్‌ పర్వత ప్రాంతాలకు చేరుకుంటాం.

* మేం భారతదేశం మీదుగా ప్రయాణించినా ఒక్క నాగాలాండ్‌లో తప్ప ఇంకెక్కడా ఆగం. అందుకే మీరు పెద్దగా మమ్మల్ని చూసి ఉండరు.

ప్రయాణంలోనే బొజ్జ నింపుకొంటూ..

* మేం ఇలా ప్రయాణించే క్రమంలోనే మా ఆహారాన్ని వెతుక్కుంటాం.

* ఎలా అంటే.. సరిగ్గా అదే సమయంలో మాల్దీవులు, లక్షద్వీపాల నుంచి మడగాస్కర్‌, ఆఫ్రికాకు తూనీగలు పెద్ద సంఖ్యలో వలస వెళతాయి.

* ఇందులో కొన్ని మాకు ఆహారంగా పనికి వస్తాయి.

* వీటికి తోడు చీకట్లో సంచరించే కీటకాలు, మిడతలు, మిణుగురు పురుగుల వంటి వాటినీ హాయిగా తినేస్తాం.

* ఇలా ఎంచక్కా బొజ్జ నింపుకొంటూ ఆఫ్రికాకు పయనమవుతాం అన్నమాట.

* ప్రయాణం ముగిసిన తర్వాత.. పచ్చని వృక్షాలు, ఆహ్లాదకర వాతావరణంతో ఉండే ఆఫ్రికా మాకు మరింత పుష్కలంగా ఆహారాన్ని అందిస్తుంది.

* మేం ప్రయాణంలో మాత్రమే కీటకాలను ఆహారంగా తీసుకుంటాం. దక్షిణ సైబీరియా, చైనా, నాగాలాండ్‌లోనూ, అక్కడి నుంచి ఆఫ్రికాకు చేరుకున్నాక కీటకాలతో పాటు చిన్న చిన్న పక్షులు, ఇతర జీవులనూ ఆహారంగా తీసుకుంటాం.

మేలో తిరిగి చలో చలో...

* తిరిగి మేలో మేమంతా అరేబియా సముద్రం మీదుగా ఆసియా చేరుకుంటాం.

రష్యాలోని బైకాల్‌ సరస్సు దగ్గరలోని పర్వతాల్లో మేం రెండు నుంచి మూడు గుడ్లు పెట్టి పొదుగుతాం.

* మాలో కొన్ని అక్కడే ఉండిపోతే.. మరికొన్ని ఉత్తర చైనాలోని పర్వతప్రాంతాలకు వెళ్లిపోతాయి.

తీరులో ఆడ.. మగ వేరు●

* మీరు మాలో ఆడ, మగ పక్షుల్ని తేలిగ్గా గుర్తించగలుగుతారు.

* మగవి ముదురు బూడిద రంగులో, పొట్ట దగ్గర కాస్త తెలుపు వర్ణంలో, కళ్ల చుట్టూ ఎర్రని చారతో ఎరుపు వేళ్లతో అందంగా ఉంటాయి.

* ఆడవి కాస్త భిన్నంగా తెలుపు నలుపు మచ్చలతో ఆకట్టుకునేలా ఉంటాయి.

* శరీర పరిమాణంలో మాత్రం పెద్దగా తేడా ఏమీ ఉండదు.

* రెక్కలు విప్పితే 63 సెంటీ మీటర్ల నుంచి 71 సెంటీమీటర్ల వరకు పొడవుంటామంతే.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని