చెట్టు.. అదిరేట్టు!

చూడండి.. చెయ్యండి

మనందరికీ బొమ్మలు గీయడం అంటే భలే సరదా కదా! పెన్సిళ్లు, స్కెచ్‌లు.. ఇలా బోలెడు సరంజామా కావాలి. కానీ ఇవేమీ లేకుండానే ఎంచక్కా చెట్టు బొమ్మను చేయొచ్చు. ఎలాగో నేర్చుకుందామా మరి!
తయారీ విధానం:
* ముందుగా అమ్మానాన్న సాయంతో మీ పెరట్లోని కొన్ని ఎండుపుల్లలు తెచ్చుకోండి.
* ఇవి వివిధ పరిమాణాల్లో ఉండేలా చూసుకోండి.
* చిన్న పేపర్‌ ప్లేట్‌లో కాస్త జిగురు పోసుకోండి.

* చెవులు శుభ్రం చేసుకునే కాటన్‌ బడ్‌ను ఒకదాన్ని తీసుకుని కాస్త లావు, పొడవున్న కర్రపుల్లకు దీని సాయంతో జిగురు రాయండి.
* నెమ్మదిగా చార్ట్‌పై ఈ కర్రపుల్లను అతికించండి. ఇది చెట్టు కాండం అన్నమాట.

* తర్వాత చిన్న.. చిన్న.. పుల్లలు తీసుకుని చిన్న కొమ్మల్లా ఇలాగే అతికించండి. కాసేపు ఆరనివ్వండి.
* తర్వాత మరో కాటన్‌ బడ్‌ను తీసుకుని తెల్లరంగులో ముంచి చిత్రంలో చూపించినట్లుగా అద్దండి. ఇది మంచు అన్నమాట.

* చెట్టు మొదలు దగ్గర ఎక్కువగా అద్దండి.. చెట్టు పైన, చుట్టుపక్కల అక్కడక్కడ పై నుంచి మంచుపడుతున్నట్లు అద్దండి. ఆరిన తర్వాత దీన్ని అమ్మానాన్న సాయంతో షోకేస్‌ గ్లాసుకో, మీ స్టడీరూంలోనో అతికించుకోండి.
* కాస్త లావున్న చార్టు మీద అయితే రెండువైపులా ఇలా చేసి.. దారంతో వేలాడదీసుకున్నా.. చూడటానికి భలేగా ఉంటుంది.
కావాల్సిన వస్తువులు
* ఎండిపోయిన కర్ర పుల్లలు
* జిగురు (గమ్‌)
* తెల్ల రంగు
* చెవులు శుభ్రం చేసుకునే కాటన్‌ బడ్స్‌
* చార్ట్‌