ఎంచక్కా చేద్దామా చక్కని విమానం!

చూడండి..

చెయ్యండి

‘రెక్కలుంటాయి కానీ పక్షి కాదు. అయినా దూర తీరాలకు ఎగురుతుంది.. ఏంటది? చెప్పుకోండి?’.. ఓస్‌.. ఈ పొడుపు కథ సమాధానం మాకు తెలుసోచ్‌! అంటారా?! జవాబు తెలిస్తే తెలిసింది.. మరి విమానం తయారు చేయడం వచ్చా మీకు? రాదు కదూ! మరేం ఫర్లేదు.. ప్లాస్టిక్‌ సీసాతో ఓ చక్కని విమానం ఎలా తయారు చేసుకోవాలో ఈ రోజు తెలుసుకుందాం సరేనా?!

ఏమేం కావాలంటే..

* ప్లాస్టిక్‌ సీసా ● రంగుల చార్టులు ● జిగురు (గమ్‌) లేదా పారదర్శక టేప్‌ (కరెన్సీ నోట్లు చిరిగితే అతికించేది)

ఎలా చేయాలంటే.. ●

* ముందుగా ప్లాస్టిక్‌ సీసా తీసుకోండి. ఒకటో చిత్రంలో చూపించినట్లు రెండు తెల్ల చార్టులను గమ్‌తో లేదా టేప్‌తో అతికించుకోండి. చివర్లో విమానం తోక ఆకారం వచ్చేలా చూసుకోవాలి.

* తర్వాత రెండో చిత్రంలో చూపించినట్లు తెల్ల చార్టును నీళ్ల సీసాకు అతికించుకోండి.

* సీసా మూత పరిమాణంలో గుండ్రంగా కొన్ని ముక్కలు అమ్మానాన్న సాయంతో కత్తిరించిపెట్టుకోండి. ఇవి విమానం కిటికీలన్నమాట.

* తర్వాత కాషాయం రంగులోని చార్టులను గుండ్రంగా చుట్టుకొని.. ప్లాస్టిక్‌ సీసాకు పక్కల్లో అతికించుకోండి.

* ఇప్పుడు మెరూన్‌ రంగులోని చార్టును రెక్కల్లా కత్తిరించుకుని.. ఇంతకు ముందు సిద్ధం చేసుకున్న కాషాయం రంగు చార్టులపై జాగ్రత్తగా అతికించండి.

* తర్వాత తోక భాగంలో చిన్నగా కత్తిరించి పెట్టుకున్న చిన్న రెక్కలవంటి చార్టు ముక్కలను అతికించుకోండి.

* తర్వాత కిటికీల ఆకారంలో తయారు చేసి పెట్టుకున్న చార్టు ముక్కలనూ అతికించండి.

* చివరగా విమానం ప్రొపెల్లర్‌లా కత్తిరించి పెట్టుకున్న చార్టు ముక్కను ప్లాస్టిక్‌సీసా మూత వద్ద సిద్ధం చేసుకోండి.

* ఇంకేం విమానం తయార్‌! ఎంచక్కా షోకేస్‌లో పెట్టేయండి మరి.