అదిరేట్టు.. చకచకా.. చెట్టు!

చూడండి చెయ్యండి

పచ్చని చెట్లు చూడటానికి బాగుంటాయి కదూ! అంతే కాదు.. పర్యావరణానికి ఎంతో మేలు చేస్తాయి. అందుకే మనం వీలుంటే ప్రతి పుట్టినరోజుకు కనీసం ఓ మొక్కను నాటి దాన్ని సంరక్షించాలి.. సరేనా! ఇక ఇప్పుడైతే చార్టులతో చూడచక్కని చెట్టుబొమ్మను తయారు చేయడం ఎలాగో నేర్చుకుందామా!

ఏమేం కావాలంటే..

* రంగు రంగుల చార్టులు,

* జిగురు (గమ్‌)

ఎలా చేయాలంటే..

* ముందుగా ఓ చార్టు తీసుకోండి.

* దీనిపై కార్డుబోర్డు రంగులో ఉండే చార్టును చెట్టు కాండం, కొమ్మల ఆకారంలో అమ్మానాన్న సహకారంతో కత్తిరించుకుని అతికించుకోవాలి.

* కాసేపు ఆరనివ్వాలి. ఈ లోగా రంగురంగుల చార్టులను పొడవాటి ముక్కలుగా కత్తిరించుకోవాలి. ●

* ఒక కొనను మరో కొనతో కలిపి వృత్తాకారంలో అతికించుకోవాలి.

* ఇలా మనకు కావాల్సినన్ని సిద్ధం చేసుకోవాలి.

* తర్వాత చెట్టు కొమ్మలకు ఈ వృత్తాలను అతికించుకుంటూ వెళ్లాలి.

* చివర్లో ఆకుపచ్చ రంగు చార్టును ముక్కలుగా కత్తిరించుకుని చెట్టు మొదలు దగ్గర అటూ ఇటూ అతికించుకోవాలి. ఇది నేలపై పెరిగిన గడ్డి అన్నమాట.

* ఓ నాలుగు వృత్తాలనూ.. ఆకుపచ్చ రంగు చార్టుపై అతికించుకోవాలి. ఇవి నేలరాలిన ఆకుల్లాగా కనిపిస్తాయి.

* ఇంకేం.. చెట్టు సిద్ధం. ఎంచక్కా షోకేస్‌లో పెట్టేసుకోండి.

* అంతకంటే ముందు దీంతో ఓ సెల్ఫీ దిగడం మాత్రం మరిచిపోకండేం!