నేలైనా.. నీరైనా..రయ్‌..రయ్‌..!

‘‘కీక్‌.. కీక్‌.. అని హారన్‌ మోగించుకుంటూ ఓ బైక్‌ వస్తోంది... వస్తోంది.. వచ్చేసింది! అరరె.. ఏంటది రోడ్డు దిగింది. అయ్యో.. అంకుల్‌ మిమ్మల్నే.. బ్రేక్‌ వేయండి ముందు పే..ద్ద చెరువుంది. అయ్యో.. అయ్యో.. అయ్యయ్యో... బైక్‌ నీళ్లలోకి వెళ్లిపోయిందే.. హుమ్‌..ఇదేంటి నీళ్లలో మునిగిపోకుండా స్టీమర్‌లా రివ్వున దూసుకుపోతోంది. భలే ఉందే!..’’ ఈ బైక్‌ను చూసిన వాళ్లు ఎవ్వరైనా సరే ఇలా ఆశ్చర్యపోవాల్సిందే!!
అచ్చం జేమ్స్‌బాండ్‌ సినిమాలోలా నేలమీదా.. నీళ్లమీదా దూసుకెళ్లగలిగే ఈ బైక్‌ పేరు బిస్కీ! పేరు భలే గమ్మత్తుగా ఉంది కదూ! దీనిలో 55 హెచ్‌పీ సామర్థ్యమున్న డబుల్‌ సిలిండర్‌ ఇంజిన్‌ ఉంటుంది. దీని ప్రత్యేకత ఏంటంటే.. ఈ బైక్‌ నేల మీద నుంచి నీటిలోకి వెళ్లిన అయిదు సెకండ్లలోనే తనను తాను మార్చుకుంటుంది. నీటిమీద నడిచేలా సిద్ధమైపోతుంది.

వేగంలో మిన్న
ఈ బిస్కీ నేల మీద గంటకు గరిష్ఠంగా సుమారు 128 కిలోమీటర్ల వేగంతో పరుగులు పెడుతుంది. అదే నీళ్లమీద దాదాపు 59 కిలోమీటర్ల వేగంతో దూసుకుపోతుంది. నీళ్లలో ఈ వేగం అంటే మాటలు కాదు. ఈ బైక్‌ ఇంచుమించుగా 227 కిలోల బరువుంటుంది. దీన్ని ఇంగ్లాండ్‌కు చెందిన ఓ ఆటోమొబైల్‌ సంస్థ రూపొందించింది. ఇంకేం.. ఎంచక్కా నాన్నతో చెప్పి ఓ బిస్కీని కొనేసుకుందాం.. హాయిగా నీళ్లలోనూ జామ్‌..జామ్‌ అని తిరిగేయొచ్చు అని అనుకుంటున్నారేమో.. అదేం కుదరదు. ఎందుకంటే ఇది ఇంకా మార్కెట్‌లోకి రాలేదు మరి! మొత్తానికి ఇవండీ బుజ్జి బిస్కీ విశేషాలు!