Updated : 14 Jun 2021 01:21 IST

బెనిన్‌.. ఇదో కవలల దేశం!

నేస్తాలూ.. మీకు బెనిన్‌ తెలుసా..? అదో చిన్న దేశం. మనలో చాలా మంది ఇంతకు ముందు దాని పేరు కూడా విని ఉండరు. కానీ ఈ దేశానికో ప్రత్యేకత ఉంది. దీనికి కవలల దేశం అని పేరు. ప్రపంచంలో ఏ దేశంలోనూ ఇక్కడ పుట్టినంత మంది కవలలు పుట్టరట. భలే తమాషాగా
ఉంది కదూ..!
ఆ దేశం పేరు బెనిన్‌. ఆఫ్రికా ఖండంలో ఉందిది. ఈ దేశంలో ఎక్కడ చూసినా కవలలు ఎక్కువగా పుడుతున్నారు. ఇది గమనించిన పరిశోధకులు సర్వే చేస్తే ఆశ్చర్యపోయే విషయం తెలిసింది. అదేంటంటే.. ప్రపంచవ్యాప్త సగటు ప్రతి వెయ్యి మందికి 13.1 మంది పుడుతుంటే ఈ దేశంలో మాత్రం 27.9 మంది కవలలు పుడుతున్నారు. అదే కనుక మన ఆసియా, లాటిన్‌ అమెరికా దేశాల్లో అయితే ఈ సంఖ్య కేవలం 9గానే ఉంది.

ఎందుకిలా?
ఈ ప్రశ్నకు సమాధానం ఇప్పటివరకూ తేలలేదు. పరిశోధకులు మాత్రం తినే తిండి బట్టి, అక్కడి వాతావరణం బట్టి అలా జరగొచ్చనే అభిప్రాయాలు చెబుతున్నారు కానీ సరైన కారణాలు మాత్రం చెప్పలేకపోతున్నారు. ఇంకో విచిత్రం ఏంటంటే.. ఈ కవలలు కూడా బెనిన్‌, నైజీరియా, టోగో వంటి దేశాల్లో నివసించే యురూబా అనే తెగలోనే ఎక్కువగా పుడుతున్నారట. ఏదేమైనప్పటికీ కవలల దేశంగా బెనిన్‌ అందరికీ గుర్తుండిపోతుంది. అదన్నమాట సంగతి.


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని