ఒక రోబో.. ఓ రూబిక్‌ క్యూబ్‌..!

అదో రంగు రంగుల గళ్ల ఆట వస్తువు. దాని పేరు రూబిక్‌ క్యూబ్‌. నిజానికి దాన్ని ఆటవస్తువు అనేకంటే.. పజిల్‌ అనడమే సబబు! మరి దీన్ని రోబోలు సాల్వ్‌ చేస్తే.. ‘ఊరుకోండి.. మన మనుషులకే చాలా కష్టం. ఎంతో ప్రాక్టీస్‌ చేస్తే కానీ చేయలేం. అలాంటిది రోబోలు ఏం చేస్తాయి?’ అని అంటారేమో! కానీ రోబోలూ రూబిక్‌ క్యూబిక్‌ను ఓ ఆట ఆడించాయి.. ఆడిస్తున్నాయి. రికార్డుల మోత మోగిస్తున్నాయి. మరి ఆ విశేషాలు ఏంటో తెలుసుకుందామా!

రూబిక్‌ క్యూబ్‌ చూడ్డానికి కలర్‌ఫుల్‌గా బాగానే ఉంటుంది కానీ.. దీన్ని సాల్వ్‌ చేయాలంటేనే తలప్రాణం తోకకు వస్తుంది. కానీ కొంతమంది మాత్రం చకచకా వేళ్లను కదిపేస్తూ పరిష్కరిస్తుంటారు. కేవలం మనుషులేనా.. మేమూ ఈ పని చేయగలం అని కొన్ని రోబోలు నిరూపించాయి. అందరినీ నోరెళ్లబెట్టేలా చేశాయి. ప్రపంచ రికార్డులనూ కొల్లగొట్టాయి. అమెరికాకు చెందిన బెన్‌కాట్జ్‌, జార్డ్‌ డి కార్లో అనే ఇద్దరు పరిశోధకులు కలిసి ఓ రోబోను రూపొందించారు. ఇది కేవలం 0.38 సెకన్లలోనే రూబిక్‌ క్యూబ్‌ను పరిష్కరించింది. అంటే కనురెప్ప వేసేంతలోనే అన్నమాట! ప్రస్తుతం ఇదే అత్యుత్తమ రికార్డు. గిన్నిస్‌బుక్‌ ఆఫ్‌ వరల్డ్‌ రికార్డ్స్‌లో స్థానం కూడా సంపాదించింది. ఈ రోబోలో శక్తిమంతమైన మోటార్లను వాడారు. ఇవి కేవలం 10 మిల్లీ సెకన్ల సమయంలోనే రూబిక్‌ క్యూబ్‌ను ఒకసారి తిప్పగలవు. ఇంత వేగం ఉంది కాబట్టే కేవలం 0.38 సెకన్లలోనే రికార్డు సాధించింది.

ఇంతకు ముందు...

రికార్డుల ప్రకారం చూసుకుంటే ఒక మనిషి ఈ పనిచేయడానికి అతి తక్కువగా 4.69 సెకన్ల సమయం తీసుకుంది. బెన్‌కాట్జ్‌, జార్డ్‌ డి కార్లో రూపొందించిన రోబో ఈ 0.38 సెకన్ల రికార్డు సాధించడానికి కొన్ని సంవత్సరాల ముందు.. వేరే రోబో రూబిక్‌ క్యూబ్‌ను 0.637 సెకన్లలో పరిష్కరించింది. ఇలా ఇప్పటి వరకు ఓ ఏడు రోబోలు రూబిక్‌ క్యూబ్‌తో ఓ ఆటాడుకున్నాయి. మొత్తానికి ఇవీ విశేషాలు. ఏంటీ.. మీరూ రూబిక్‌ క్యూబ్‌ను ఓ పట్టుపట్టాలి అనుకుంటున్నారా నేస్తాలూ..! అయితే ఆల్‌ ది బెస్ట్‌!