వెదురంటే నాకిష్టం!

నాకు వెదురంటే ఇష్టం.. కానీ నేను పాండాను కాదు. నాకు పొడవైన తోక ఉంటుంది కానీ నేను కోతిని కాదు. నేను అత్యంత అరుదైన జీవిని. ఇంతకీ నా పేరేంటో, నేను ఎక్కడుంటానో చెప్పుకోండి చూద్దాం! తెలియదా.. ఫర్లేదు ఫ్రెండ్స్‌.. నా గురించి చెప్పుకోవడానికే నేను ఇలా వచ్చాను. ఈ కథనం చదివేయండి మీకే తెలుస్తుంది.

నా పేరు గ్రేటర్‌ బ్యాంబూ లేమర్‌. నేను ఎక్కువగా వెదురు మొలకలు, ఆకులు, కొమ్మలు తిని బతుకుతాను. మడగాస్కర్‌లో మాత్రమే కనిపిస్తాను. నేను పొడవైన తోకతో కాస్త చూడ్డానికి కోతిలా ఉంటాను. చక్కగా చెట్లు ఎక్కగలను. నేను వాటిమీదే ఎక్కువగా కాలం గడుపుతాను.

ముందు కాళ్ల కన్నా..

నేను దాదాపు 46 సెంటీమీటర్ల వరకు పొడవు పెరుగుతాను. బరువేమో దాదాపు 2.3 కిలోల వరకు తూగుతాను. నా ముందు కాళ్ల కన్నా, వెనక కాళ్లే పొడవుగా, బలంగా ఉంటాయి. ఒక చెట్టు మీద నుంచి మరో చెట్టు మీదకు దూకడానికి ఇవి ఉపయోగపడతాయి. తోక కూడా బ్యాలెన్స్‌ చేసుకోవడానికి తోడ్పడుతుంది.

అత్యంత అరుదు..

మా గురించి బాహ్య ప్రపంచానికి పెద్దగా తెలియదు. కారణం ఏంటంటే.. మేం కేవలం మడగాస్కర్‌లోనే జీవిస్తాం. మా సంఖ్య కూడా చాలా తక్కువ. ప్రపంచం మొత్తం మీద మా గ్రేటర్‌ బ్యాంబూ లేమూర్‌లు సుమారు 100 నుంచి 160 వరకు మాత్రమే జీవించి ఉన్నాయని అంచనా.

వేటాడేస్తాయి..

మేం కనబడితే చాలు ఫోసా (పిల్లిలాంటి జీవి), బుష్‌ పిగ్స్‌ మమ్మల్ని కరకరలాడించేస్తాయి. డేగలు, గద్దలు కూడా చంపేస్తుంటాయి. వీటి నుంచి తప్పించుకుంటూ.. మమ్మల్ని మేం కాపాడుకుంటూ ఉంటాం. ముఖ్యంగా మేం నిద్రపోయినప్పుడే శత్రువుల చేతికి తేలిగ్గా చిక్కుతాం. అందుకే మేం చెట్టు తొర్రల్లో ఎక్కువగా నిద్రపోతుంటాం. మా ప్రాణాల్ని మేం కాపాడుకోవడానికే ఈ ఏర్పాటన్నమాట.

గుంపులు.. గుంపులుగా..

మేం గుంపులు గుంపులుగా జీవిస్తాం. మా పిలుపులూ ప్రత్యేకంగా ఉంటాయి. మేం దాదాపు ఏడు రకాల శబ్దాల ద్వారా మాట్లాడుకుంటాం. ఇంతకీ మేం ఎంతకాలం బతుకుతామో చెప్పనేలేదు కదూ! దాదాపు 17 సంవత్సరాల వరకు జీవిస్తాం. నేను వెదురుతోపాటు ఇతర మొక్కల పువ్వులు, గడ్డిని తింటుంటాను. గ్లోబల్‌ వార్మింగ్‌, ఇష్టారీతిన అడవుల్ని నరకడం, వేట వల్ల మా సంఖ్య వేగంగా తగ్గిపోతోంది. నేస్తాలూ.. మొత్తానికి ఇవీ మా విశేషాలు. ఇక ఉంటామరి. బై.. బై..!

• Bamboo
• Panda
• Long tail
• Enemies