నేనో నానో రూబిక్‌ క్యూబ్‌ను!

హాయ్‌.. నేస్తాలూ..! మీ అందరికీ రూబిక్‌ క్యూబ్‌ అంటే తెలిసే ఉంటుంది కదూ! మీరు చాలాసార్లు దాంతో ఆడుకునే ఉంటారు. లేదా.. కనీసం ఏ టీవీల్లోనో.. ఆఖరుకు గూగుల్‌లోనో చూసుంటారు. మామూలుగా అయితే అది అరచేతిలో పట్టేంత ఉంటుంది కదా! కానీ ప్రపంచంలోకెల్లా అతిచిన్న రూబిక్‌ క్యూబ్‌నైన నేను ఎంత ఉంటానో తెలుసా?!..

జపాన్‌కు చెందిన ఓ బొమ్మల తయారీ కంపెనీ ప్రపంచంలోనే అత్యంత చిన్నదైన రూబిక్‌ క్యూబిక్‌నైన నన్ను తయారు చేసింది. నేను కేవలం 9.9 మిల్లీమీటర్లు ఉంటాను. బరువేమో రెండంటే రెండు గ్రాములంతే! పోస్టల్‌ స్టాంప్‌ మీద సరిగ్గా సరిపోతాను. నేను అంత చిన్నగా ఉంటానన్నమాట.

ధర ఘనం!

దాదాపు మీ షర్ట్‌ బటన్‌ అంత ఉండే నా ధర వింటే మాత్రం ‘అమ్మో.. అంతా.. మరీ ఎక్కువ!’ అని మీరు నోరెళ్లబెట్టేస్తారు. గత సంవత్సరం ఒకరు నన్ను లక్షా పదకొండువేల రూపాయలకు కొనుక్కున్నారు. మామూలుగా రూబిక్‌ క్యూబ్‌ను సాల్వ్‌ చేయడమే కష్టం అనుకుంటే.. నానో రూబిక్‌ క్యూబ్‌నైన నన్ను తయారు చేయడమూ కష్టమే. నా తయారీ కోసం ప్రత్యేక మెటీరియల్‌ను వాడారు. ఈ విషయం ఆ నోటా ఈ నోటా విని.. ఆ చోటా ఈ చోటా తెలుసుకుని నానో రూబిక్‌ క్యూబ్‌లు తమకూ కావాలని ఆ బొమ్మల తయారీ కంపెనీని సంప్రదిస్తున్నారు. మొత్తానికి ఇవీ   నా విశేషాలు.

మీకు తెలుసా!

* మొట్టమొదటి సారిగా 1970లో హంగేరియన్‌ ఆర్కిటెక్చర్‌ ఎర్నో రూబిక్‌.. రూబిక్‌ క్యూబ్‌ను తయారు చేశాడు.

* ప్రజలకు 1974 నుంచి అందుబాటులోకి వచ్చింది.

* ఓ అమెరికా కంపెనీ 1980 నుంచి రూబిక్‌ క్యూబ్‌ను వాణిజ్యపరంగా పెద్దఎత్తున ఉత్పత్తి చేయడం ప్రారంభించింది.

* తర్వాత రెండు సంవత్సరాల్లో ఏకంగా 10 కోట్ల రూబిక్‌ క్యూబ్‌లు ప్రపంచవ్యాప్తంగా అమ్ముడయ్యాయి.

* మొదటి ఎనిమిది నెలల్లో ఒక్క జపాన్‌లోనే దాదాపు 40 లక్షల రూబిక్‌ క్యూబ్‌లు అమ్ముడైపోయాయి.