ఆ బడికెళ్తే కళ్లు జిగేల్‌!

అనగనగా ఓ బడి.. అది మామూలు బడే... కానీ ఓ విషయం దాన్ని ప్రత్యేక బడిని చేసింది. అది ఏంటంటే... ఆశ, దోశ, అప్పడం, వడ.. ఇక్కడే తెలుసుకుందామనా? ఆ పప్పులేం ఉడకవు! కథనంలోకి వెళ్లాల్సిందే ఫ్రెండ్స్‌.. అప్పుడే మీకు అసలు విషయం తెలుస్తుంది!

కర్ణాటకలోని మంగళూరు శివార్లలో కైరంగలలో శారద గణపతి విద్యాకేంద్రం ఉంది. ఈ పాఠశాలలో ఒకటి కాదు.. రెండు కాదు.. మూడు కూడా కాదు... ఆఖరుకు నాలుగు కూడా కాదు నేస్తాలూ..! ఏకంగా 11 కవల జంటలున్నాయి. ఇందులో నాలుగు బాలుర, మూడు బాలికల, నాలుగు మిక్స్‌డ్‌ (బాలుడు, బాలిక) కవల జంటలున్నాయి. అందుకే ఈ బడికి ఎవరైనా కొత్త వారు వస్తే, ఈ కవలలను చూసి ఒక్కసారిగా అవాక్కవుతారు.

2008 నుంచే...

దు ఈ పాఠశాలకు ఏ ప్రత్యేకతా లేదు. ఇది కూడా సాదాసీదా బడే. 2008వ సంవత్సరం నుంచే ఈ బడిలో కవలలు చేరడం మొదలైంది. ఇలా ఇప్పటి వరకు కవల జంటల సంఖ్య 11కి చేరింది. వీరంతా నాలుగో తరగతి నుంచి 12వ తరగతి వరకు చదువుతున్నారు. బడిలో ఒక్క జంట కవలలు ఉంటేనే మనం తెగ ఆశ్చర్యపోతాం. అలాంటిది ఈ బడిలో ఏకంగా 11 జంటల కవలలు ఉన్నారు. అందుకే ఈ పాఠశాలకు ‘కవలల బడి’ అనే పేరు కూడా వచ్చింది.

బడి పేరు కూడా...

ఈ పాఠశాలలో నాలుగో తరగతిలో మూడు, అయిదో తరగతిలో రెండు, ఆరు, ఏడు, ఎనిమిది, పదో తరగతుల్లో ఒక్కో జంట, 12వ తరగతిలో రెండు జంటల కవలలున్నారు. మరో గమ్మత్తైన విషయం ఏంటంటే.. ఈ పాఠశాల పేరులోనూ ‘శారద- గణపతి’ అనే జంట పేర్లున్నాయి. విద్యకు సరస్వతీ దేవితోపాటు, గణపతిని కూడా ప్రతీకగా కొలుస్తుంటారు.

నేస్తాలూ! మొత్తానికి ఇవీ ఈ ‘కవలల బడి’ విశేషాలు. అన్నట్లు మీ బడిలో కానీ, మీ స్నేహితుల్లో కానీ ఎవరైనా కవలలున్నారా?!