బుజ్జి పట్టణం.. చూసొద్దాం రండి!
హాయ్ ఫ్రెండ్స్.. ప్రపంచంలోని వింతలూ, విశేషాల గురించి మీకు చాలానే తెలిసి ఉంటాయి. కానీ, ఎన్ని తెలుసుకున్నా.. తెలియనివి ఇంకా అనేకం ఉంటూనే ఉంటాయి.
హాయ్ ఫ్రెండ్స్.. ప్రపంచంలోని వింతలూ, విశేషాల గురించి మీకు చాలానే తెలిసి ఉంటాయి. కానీ, ఎన్ని తెలుసుకున్నా.. తెలియనివి ఇంకా అనేకం ఉంటూనే ఉంటాయి. ఇప్పుడు మనం చెప్పుకోబోయే అంశం కూడా ఆ కోవకు చెందినదే. మరి.. ఆ వింత ఏంటో, దాని ప్రత్యేకతలేంటో తెలుసుకుందామా..
క్రొయేషియాలోని ‘హమ్’ అనే ప్రాంతం ప్రపంచంలోనే అతి చిన్న పట్టణమట. ఈ విషయం నేను చెప్పడం లేదు నేస్తాలూ.. ‘గిన్నిస్ బుక్ ఆఫ్ వరల్డ్ రికార్డ్స్’ ప్రతినిధులే చెబుతున్నారు.
రెండే వీధులు..
ఆ దేశ రాజధాని నగరానికి కూత వేటు దూరంలో ఉండే హమ్ పట్టణం మధ్యయుగానికి చెందినది. చుట్టూ కొండలు, మూడు వరసల్లో రాతి ఇళ్లు, రెండు వీధులు మాత్రమే ఉండే ఈ పట్టణ జనాభా కేవలం 27 మంది. 2011లో 21గా ఉన్న ఇక్కడి జనాభా గతేడాదికి 27కు పెరిగింది. చారిత్రక ఆధారాల ప్రకారం ఈ పట్టణం 1102వ సంవత్సరంలో వెలుగులోకి వచ్చిందట. అంటే.. అంతకు ముందే ఏర్పడిందన్నమాట. దీని గురించి బయటి ప్రపంచానికి తెలిసిన తర్వాత.. ఒక్కొక్కరుగా నివాసం ఏర్పరచుకోసాగారు. ఈ పట్టణం రక్షణకు స్థానికులే 1552లో ఓ పెద్ద గంటతోపాటు వాచ్ టవర్ను ఏర్పాటు చేశారు. బందిపోట్ల నుంచి ప్రమాదం లేకుండా పట్టణం చుట్టూ చాలా ఎత్తులో రాళ్లతో గోడనూ నిర్మించారు. ఎటుచూసినా పచ్చని పర్వతాలు, భారీ వృక్షాల మధ్య ఉండే ఇది.. కేవలం వంద మీటర్ల పొడవూ, 30 మీటర్ల వెడల్పు మాత్రమే ఉంటుంది. మొదట దీన్ని గ్రామంగా గుర్తించినా.. ఇంతకంటే చిన్నవి కూడా ఉండటంతో.. ‘హమ్’కు పట్టణ హోదా కల్పించారు. ఇంకో విషయం ఏంటంటే.. ఈ పట్టణం ఇప్పటికీ చెప్పుకోదగినంతగా అభివృద్ధి చెందలేదట.
పర్యాటకుల వరస
ప్రపంచంలోనే అతి చిన్న పట్టణంగా గుర్తింపు పొందిన ఈ ప్రాంతానికి పర్యాటకులు వరస కడుతున్నారు. ఇక్కడ చూసేందుకు ప్రత్యేకంగా ఏమీ లేకపోయినా.. మధ్యయుగం నాటి శిల్పకళా వైభవం, రాళ్లతో నిర్మించిన ఇళ్లు, వీధులను చూసేందుకే దేశవిదేశాల నుంచి వస్తుంటారట. వారికి స్థానికులే దగ్గరుండి మరీ స్వాగతం పలుకుతుంటారు. ఈ ఊరికి ఒక మూలన ఉన్న ఖాళీ ప్రాంతంలో ఓ బెంచీని ఏర్పాటు చేశారట. టూరిస్టులు దాని మీద కూర్చొని.. ప్రకృతి అందాలను ఆస్వాదిస్తూ, ఫొటోలు దిగుతూ మురిసిపోతుంటారు. అధిక శాతం నగరాలు ఎప్పటికప్పుడు విస్తరిస్తూనే ఉంటాయి కదా.. కానీ, ఈ పట్టణం మాత్రం రాతి గోడ కట్టినప్పుడు ఎంత ఉందో.. ఎటువంటి ఆక్రమణలు, చొరబాట్లు లేకుండా ఇప్పటికీ అంతే విస్తీర్ణంలో ఉందట. ఇవండీ ఈ బుజ్జి పట్టణం విశేషాలు.. భలే ఉన్నాయి కదూ!
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
తాజా వార్తలు (Latest News)
-
నేటి రాశి ఫలాలు.. 12 రాశుల ఫలితాలు ఇలా... (26/04/24)
-
ముయిజ్జు పార్టీకి ‘సూపర్ మెజార్టీ’.. భారత్ స్పందనిదే...
-
బంగ్లాదేశ్ను చూసి సిగ్గు పడుతున్నాం - పాకిస్థాన్ ప్రధాని
-
ప్రీమియర్ షోలో మెరిసిన తారలు.. అలియా అలా.. రష్మిక ఇలా..
-
ఎట్టకేలకు తెలుగులో ‘OMG2’.. స్ట్రీమింగ్ ఎక్కడంటే?
-
‘హీరామండీ’తో నా కల నెరవేరింది: సోనాక్షి సిన్హా