పిసరంత మర పీత!

అదో పీత... మామూలు పీత కాదు. మర పీత! ఇది ఎంచక్కా నడుస్తుంది. చక్కగా తిరుగుతుంది. బేషుగ్గా దూకుతుంది. స్ప్రింగులా వంగుతుంది. చకచకా మెలితిరుగుతుంది. భలే తమాషాగా ఉంది కదూ! మరి మరిన్ని వివరాలు తెలుసుకోవాలని ఉందా...! అయితే ఇంకెందుకాలస్యం ఈ కథనం చదివేయండి.

అమెరికాకు చెందిన నార్త్‌వెస్ట్రన్‌ యూనివర్సిటీ ఇంజినీరింగ్‌ పరిశోధకులు ఈ మర పీతను తయారు చేశారు. ఇది కేవలం అర మిల్లీమీటరే ఉంటుంది. అంటే ఈగకన్నా కూడా మరీ చిన్నగా ఉంటుంది. సూది బెజ్జంలో కూడా దూరేంత సూక్ష్మంగా ఉంటుందన్నమాట. ఇంతకీ ఈ పిసరంత మర పీత మీద ఎందుకు ప్రయోగాలు చేస్తున్నారో తెలుసా! పరిశ్రమల్లోని చిన్న చిన్న నిర్మాణాలు, యంత్రాలను మరమ్మతు చేయడానికి, ధమనుల్లోని అడ్డంకులను తొలగించడానికి, అంతర్గత రక్తస్రావాలను ఆపడానికి, క్యాన్సర్‌ కణితులను తొలగించడానికి ఈ మైక్రో రోబోలను తయారు చేస్తున్నారు.

రిమోట్‌ సాయంతో...

ఈ రోబో పీత రిమోట్‌ సాయంతో కదులుతుంది. ఉండటం కేవలం అర మిల్లీమీటరే అయినా... వేగం మాత్రం దీని పరిమాణంతో పోల్చుకుంటే ఎక్కువ అనే చెప్పాలి. ఈ మర పీతకు మరో ప్రత్యేకత కూడా ఉంది. అదేంటంటే... దీన్ని ప్రత్యేకంగా సాగే గుణమున్న పదార్థంతో తయారు చేశారు. దీని నుంచే అది తనకు కావాల్సిన శక్తిని సమకూర్చుకుంటుందని పరిశోధకులు చెబుతున్నారు. నేస్తాలూ మొత్తానికి ఇవీ పిసరంత మర పీత సంగతులు. భలే గమ్మత్తుగా ఉన్నాయి కదూ!