వయ్యారి వారధి !

ఎంతో ఎత్తులో ఉండే వారధి... వంపులవంపుల వంతెన... విడిపోయే బ్రిడ్జ్‌... ఇలా చాలా రకాల వంతెనలుంటాయి... కానీ ఓ దగ్గర భలే చిత్రంగా ఉంది... ఎలాగుందో? ఎక్కడుందో? చదివేస్తే పోలా?!

అటో నగరం ఇటో నగరం. మధ్యలో నదీ ప్రవాహం. మరి ఇటు నుంచి అటు వెళ్లాలంటే ఎలా? అందుకే దానిపై ఓ వంతెన కట్టారు. ఎంచక్కా పాదచారులు నడుచుకుంటూ వెళతారు. సైకిళ్లు, చిన్న వాహనాలు రయ్యిమంటూ తిరిగేస్తాయి. ఇంతవరకు బాగానే ఉంది. మరి కిందున్న నీళ్లలో పడవలు వెళితే? ఎలా? దానికి బ్రిడ్జ్‌ అడ్డుగానే ఉంటుంది కదా!
* అలాంటప్పుడే ఈ వంతెన ఒక్కసారిగా పైకి వెళ్లిపోతుంది. ఆర్చ్‌లా అవుతుంది. మళ్లీ పడవలు వెళ్లాక కిందికి వంగిపోయి మామూలు బ్రిడ్జ్‌లా మారిపోతుంది.
* ఇలా ఎలా అంటే... వంతెన రెండు భాగాలుగా ఉంటుంది. ఈ రెండింటిని కలుపుతూ ఆరు మీటర్ల పొడవైన స్టీలు తీగలు ఉంటాయి. వీటి సాయంతోనే ఇదీ పైకీ కిందకీ వంగుతూ ఉంటుందన్నమాట.
* దీని పేరు గేట్స్‌హెడ్‌ మిలీనియం. ప్రపంచంలోనే ఏకైక టిల్టింగ్‌ బ్రిడ్జ్‌గా దీనికి పేరు.
* ఇంతకీ ఇది ఎక్కడుందో చెప్పలేదు కదూ! ఇంగ్లండ్‌లోని గేట్స్‌హెడ్‌, న్యూకాజిల్‌ నగరాల మధ్య టైన్‌ అనే నదిపై.
* 105 మీటర్ల పొడవుతో ఉండే ఇది కదిలే వంతెనల్లో ఓ రకం. 2001లో వినూత్నమైన పద్ధతులతో దీన్ని నిర్మించారట. అప్పట్లో అంతర్జాతీయ బ్రిడ్జ్‌ అండ్‌ స్ట్రక్చరల్‌ ఇంజినీరింగ్‌ అసోసియేషన్‌ నుంచి అద్భుతమైన నిర్మాణంగా అవార్డూ తెచ్చుకుంది.
* ప్రయాణాలకు తగ్గట్టు ఇది మూసుకుపోతూ తెరుచుకుపోతూ భలే గమ్మత్తుగా కనిపిస్తుంటుంది. అందుకే దీనిపై ఎక్కడానికే కాదు. చూడ్డానికీ సరదాగా పర్యటకులు వస్తుంటారు.