ఓ పాప పోరాటం... భలే సంచలనం!

ఓ పాప పోరాటం...
భలే సంచలనం!

పర్యావరణంపై టీవీలో కార్యక్రమం వస్తుంటే పిల్లలు ఏం చేస్తారు? ఛానెల్‌ మార్చేస్తారు... లేదా చూసి మర్చిపోతారు... కానీ ఆ పాప అలా చేయలేదు! మరిన్ని వివరాలు తెలుసుకుంది... వాటిని ప్రచారం చేసింది... పెద్ద ఉద్యమమే చేపట్టింది! మరి ఆ పాప వయసెంతో తెలుసా? ఏడేళ్లు!

పట్టుమని ఏడేళ్లు లేని పాప ఇప్పుడు పెద్ద వాళ్లను సైతం ఆలోచించేలా చేస్తోంది. అందరినీ చైతన్యవంతుల్ని చేస్తోంది. చిన్న వయసులోనే ఇంత పెద్ద పని చేస్తున్న ఆ పాపే మెరిడిత్‌ మాస్‌. బ్రిటన్‌లోని బెడ్‌పోర్డ్‌షైర్‌లో ఉంటుంది.

ఇంతకీ ఈ చిన్నారిలో ఇంత మార్పు తెచ్చిందేమిటో తెలుసా? ‘స్ట్రా’!

మనం ఎన్నో సార్లు కూల్‌డ్రింకో, కొబ్బరి నీళ్లొ తాగి పడేసే ‘స్ట్రా’లు పర్యావరణానికి ఎంత హాని కలిగిస్తాయో ఓ టీవీ కార్యక్రమంలో చూసిందీ పాప. చూసి వదిలేయకుండా ఇంటర్‌నెట్‌లో వెతికి ఎన్నో వివరాలు తెలుసుకుంది. ఆ వివరాలు తెలిశాక ఏకంగా ‘స్ట్రా’లపై పెద్ద పోరాటమే చేపట్టింది.

మరి ఆ పాప తెలుసుకున్న వివరాలేంటో తెలుసా?

* మనమంతా వాడి పారేసే స్ట్రాల వల్ల పెద్ద పెద్ద సముద్రాలు కూడా కలుషితం అవుతున్నాయి!

* ప్రపంచవ్యాప్తంగా రోజూ 50 కోట్ల స్ట్రాలను వాడి పడేస్తున్నారు!

* సముద్రాల్ని కలుషితం చేస్తున్న తొలి పది వ్యర్థాల్లో ‘స్ట్రా’ కూడా ఒకటి!

* స్ట్రాలలో ఉండే పాలీప్రొపలీన్‌ అనే పదార్థం భూమిలో కలిసిపోదు. సూర్యరశ్మి తగిలి చిన్న ముక్కలుగా మారి చివరకి సముద్రంలోకి చేరి అట్టడుగున పేరుకుపోతున్నాయి!

* వీటిని తిన్న సముద్రజీవులు పెద్ద సంఖ్యలో ప్రాణాలు కోల్పోతున్నాయి!

ఇవన్నీ తెలుసుకున్నాక ఆ పాప చాలా బాధపడింది. నాకెందుకులే అని వూరుకోకుండా ఆన్‌లైన్‌లో ప్రచారం చేస్తోంది. సంతకాల సేకరణ మొదలుపెట్టింది. ఆమె చెబుతున్న వివరాలు విని పెద్దలంతా మద్దతు పలుకుతున్నారు. అంతటితో వదిలిపెట్టలేదా చిన్నారి. ఓ వెబ్‌సైట్‌ ద్వారా పిటీషన్‌ వేసింది. సమస్యలపై ప్రజలు ఆశించే మార్పులపై పిటీషన్‌ పెట్టే అవకాశాన్ని చేంజ్‌.ఆర్గ్‌ అనే వెబ్‌సైట్‌ కల్పిస్తోంది. ఈ వెబ్‌సైట్లో దాదాపు 10 కోట్ల మంది సభ్యులున్నారు. వారందరి మద్దతుతో ఆ పాప కోరుతున్నదేమిటో తెలుసా? ‘స్ట్రాలను తయారు చేసే పెద్ద పెద్ద కంపెనీలన్నీ ఇక మీదట కాగితపు స్ట్రాలను తయారు చేయాల’ని! చూశారా... ఓ చిన్న పాప కూడా ఎంత పెద్ద పని మొదలుపెట్టిందో!