కాలినడకన చుట్టి వచ్చే బుల్లి రాజధాని!

కాలినడకన చుట్టి వచ్చే బుల్లి రాజధాని!

సీషెల్స్‌...

* సీషెల్స్‌... హిందూ మహాసముద్రంలో ఉన్న చిన్న ద్వీపదేశం. మొత్తం 115 దీవులతో ఉంటుందిది.

* ఈ బుల్లి దేశంలో ఒకప్పుడు సముద్రపు దొంగలు దాక్కునేవారు. వచ్చిపోయే నౌకల్ని లూటీ చేసి డబ్బులు ఇక్కడ దాచుకునేవారట. ‘ఆలివర్‌ లే వస్సెర్‌’ అనే సముద్రపు దొంగ దాచుకున్న లక్ష యూరోలు ఇప్పటికీ ఇక్కడే ఉన్నాయని స్థానికులు నమ్ముతుంటారు.

* రాజధాని విక్టోరియా ప్రపంచంలోనే అతి చిన్న రాజధానుల్లో ఒకటి. నడిచి వెళ్లినా ఒక్కరోజులో నగరమంతా చుట్టిరావచ్చు.

* మొత్తం భూభాగంలో సగానికిపైగా జాతీయ పార్కులతో ఉంటుందిది. పర్యావరణానికి ప్రాధాన్యం ఇచ్చే ప్రభుత్వ విధానాల వల్ల ఇది సాధ్యమైంది.

* కింగ్‌ లూయిస్‌ - 15 రాజు ఆస్థానంలో ఉన్న ఆర్థిక మంత్రి జీన్‌ మోరియో డి సీషెల్స్‌ పేరును ఈ ద్వీపానికి పెట్టారు.

* ఈ దీవిలో అందమైన తోకతో ఉన్న ‘ప్యారడైజ్‌ ఫ్లైకాట్చర్‌’ వంటి బోలెడు వింత పక్షులు ఉన్నాయి.

* మన దేశానికి సముద్ర మార్గాన్ని కనిపెట్టిన ‘వాస్కో డా గామా’ 15వ శతాబ్దంలో ఈ దీవిని గుర్తించారు. తర్వాత ఫ్రెంచ్‌, బ్రిటిష్‌ అధీనంలో ఉండి ఈ దేశం 1976లో స్వాతంత్య్రం పొందింది.

* ఆఫ్రికా ఖండంలో ఉన్న ఈ దేశం సహజవనరులతో సంపన్నంగా ఉన్న దేశాల్లో ఒకటిగా పేరుతెచ్చుకుంది.

* ప్రపంచంలోనే భారీ విత్తనం ఉన్నది ఈ దేశంలోనే. పేరు ‘కోకో డి మెర్‌’. కొబ్బరికాయని పోలి ఉన్న ఈ విత్తనం 30 కిలోల బరువు ఉంటుంది. దీన్ని ‘డబుల్‌ కోకోనట్‌’ అని కూడా పిలుస్తారు.

* జేమ్స్‌బాండ్‌ సృష్టికర్త ఇయాన్‌ ఫ్లెమింగ్‌ ‘ఫర్‌ యువర్‌ ఐస్‌ ఓన్లీ’ రాయడానికి అవసరమైన ప్రేరణ కోసం సీషెల్స్‌ని సందర్శించారు.

* హిందూ మహా సముద్రంలో ఎగరలేని పక్షి అయిన ‘వైట్‌ త్రోటెడ్‌ రైల్‌’ ఉండేది ఇక్కడే.

* 304 కిలోల అత్యధిక బరువుండే ‘ఎస్మెరాల్డా’ అనే తాబేళ్లు ఉండేది ఇక్కడే.

* ఈ ద్వీపదేశం మంచి సందర్శక ప్రాంతం. దేశదేశాల నుంచి సందర్శకులు వస్తుంటారు. ఎక్కువ ఆదాయం పర్యటకం ద్వారా పొందుతారు.

* ఇక్కడ అరుదైన జెల్లీఫిష్‌ చెట్లు ఉంటాయి. ప్రస్తుతం ఇవి ఎనిమిది మాత్రమే ఉన్నాయి.