రావణ రాజ్యమట... సముద్రపు ముత్యమట!

రావణ రాజ్యమట... సముద్రపు ముత్యమట!
శ్రీలంక

* శ్రీలంక... మన దేశానికి పొరుగు దేశం. దక్షిణ ఆసియాలో ఉండే ఈ దేశాన్ని హిందూ మహా సముద్రపు ముత్యంగా పిలుస్తారు.
* దీని ఆకారం ఆధారంగా భారత దేశపు కన్నీటి చుక్కగా మరో పేరూ ఉంది దీనికి.
* ప్రపంచంలో అందమైన ద్వీపాల్లో ఈ దేశమొకటి.
* ఈ దేశానికి మూడు వేల ఏళ్ల నాటి గొప్ప చరిత్రుంది. సంస్కృతంలో ఈ దేశం పేరుకు అర్థం ఆకర్షణీయమైన ద్వీపం అని.

దేశం: శ్రీలంక
రాజధాని: కొలంబో
జనాభా: 2,02,77,597
విస్తీర్ణం: 65,610 చదరపు కిలోమీటర్లు
భాషలు: సింహళీస్‌, తమిళం
కరెన్సీ: శ్రీలంక రూపాయి

జెండా: ప్రపంచంలోని ప్రాచీన జెండాల్లో ఇదీ ఒకటి. ఇక్కడి అన్ని రకాల సంస్కృతులకు, జాతులకు సూచిక. సింహం సింహళీయులకు, నాలుగు ఆకులు నలుమూలలా ఉన్న బౌద్ధుల నమ్మకానికి, కాషాయం, ఆకుపచ్చ హిందూ, ముస్లిం మతాలకు చిహ్నాలు.

* రామాయణ గాథలో ఈ దేశాన్ని పేర్కొన్నారు. రావణుడి రాజ్యం లంక ఇదేనని నమ్మకం.
* ప్రపంచంలోనే మొట్టమొదటి మహిళా ప్రధాని ఈ దేశానికి చెందినవారే. పేరు సిరిమావో బండారు నాయకే.

* ఈ దేశం 1948లో బ్రిటన్‌ దగ్గర్నించి స్వాతంత్య్రం పొందింది.
* 1972 వరకు ఈ దేశాన్నే ‘సిలోన్‌’ అని పిలిచేవారు.
* ఈ దేశంలో జలపాతాలు ఎక్కువ. నదులు వందకుపైగా ఉంటాయి. అధికంగా జల విద్యుత్తుపైనే ఆధారపడి ఉంటుందీ దేశం.
* ఇక్కడ చట్టాలు చాలా కఠినంగా ఉంటాయి. మాదక ద్రవ్యాల రవాణాతో పట్టుబడితే మరణ శిక్ష విధిస్తారట.

* మానవులు నాటిన అతి ప్రాచీన వృక్షం ఉందిక్కడ. ఈ వృక్షం పేరు శ్రీ మహా బోధియా.
* దక్షిణ ఆసియా మొత్తంలో అక్షరాస్యత ఎక్కువున్న దేశం ఇదే. దీని శాతం 92.
* ఇక్కడి ఆడమ్‌ పర్వత శిఖరాన్ని పవిత్ర స్థలంగా చెబుతారు. ఇక్కడ బుద్ధుడి అడుగులున్నట్టు నమ్ముతారు.
* ఎక్కువగా తేయాకు ఎగుమతి చేసే దేశాల్లో ఇదీ ఒకటి. ప్రపంచవ్యాప్తంగా ఎంతో పేరు తెచ్చుకున్న సిలోన్‌ టీ ఇక్కడే తయారవుతుంది.