ధనం... ఇంధనం... ఇక్కడి ప్రత్యేకతలు!

కువైట్‌
ధనం... ఇంధనం... ఇక్కడి ప్రత్యేకతలు!

* కువైట్‌... పశ్చిమ ఆసియాలోని ఓ బుల్లి దేశం. పర్షియన్‌ గల్ఫ్‌ తీరంలో ఉండే ఈ అరబిక్‌ దేశంలో మొత్తం తొమ్మిది దీవులుంటాయి. దక్షిణాన సౌదీ అరేబియా, ఉత్తర, పశ్చిమ దిక్కుల్లో ఇరాక్‌ దేశాలు సరిహద్దులు.

* కువైట్‌లో ఎక్కువ భాగం ఎడారి ఆక్రమించి ఉంది. ఇక్కడ అత్యంత ఎత్తయిన ప్రాంతం సముద్రమట్టం నుంచి 306 మీటర్ల ఎత్తులో ఉంటుంది.

* ప్రపంచంలోని అత్యంత ఉష్ణ దేశాల్లో ఇదీ ఒకటి. జూన్‌, ఆగస్టుల్లో ఇక్కడ వేడి మరింత ఎక్కువ. ఉష్ణోగ్రత 50 డిగ్రీల సెల్సియస్‌ దాటుతుందిట. ఏడాది పొడవునా ఇసుక తుఫాన్లు వస్తుంటాయి.

* ఈ దేశ ప్రధాన ఆర్థిక వనరు పెట్రోలియం. ప్రపంచంలోని సంపన్న దేశాల్లో ఇదీ ఒకటి.

* ఈ దేశ జాతీయ పక్షి ఫాల్కన్‌. ఇక్కడి డబ్బు నోట్లపై, స్టాంపులపై దీని బొమ్మ కనిపిస్తుంది.

*దేశం: కువైట్‌

* రాజధాని: కువైట్‌ నగరం

* జనాభా: 43,48,395 విస్తీర్ణం: 17,820 చదరపు కిలోమీటర్లు భాష: అరబ్బీ కరెన్సీ: కువైటీ దినార్‌

* రోబో జాకీల సాయంతో మొదటి సారిగా ఒంటెల పరుగు పందేల్ని ఏర్పాటుచేశారు. ఏటా ఫిబ్రవరిలో జరుగుతుంటాయీ పోటీలు.

* ఇక్కడ మంచి నీటి సరస్సులు ఉండవు. సముద్రపు నీటి నుంచి ఉప్పు వేరు చేసి తాగడానికీ, ఇంటి అవసరాలకూ వాడుకుంటారు. * ఇక్కడికి వలసలు ఎక్కువ. అత్యధిక వలస వచ్చే దేశాల్లో ఇది మూడోస్థానంలో ఉంది.

* జెండా: ఆకుపచ్చ రంగు.. అరబ్‌ దేశాల సుసంపన్నతకు, నలుపు శత్రువుల ఓటమికి, ఎరుపు శత్రువుల రక్తపాతానికి, తెలుపు స్వచ్ఛతకి గుర్తులు.

* వివిధ దేశాల కరెన్సీ కన్నా కువైటీ దినార్‌కు విలువ ఎక్కువ. ఒక్క కువైటీ దినార్‌ విలువ మన రూపాయిల్లో దాదాపు 211 రూపాయిలు.

* 1930లో మొదటిసారిగా ఈ దేశంలో ఇంధన వనరుల్ని గుర్తించారు. దేశదేశాలు వాడే ఇంధనంలో 20 శాతం ఇక్కడిదే.

* బ్రిటన్‌ నుంచి 1961లో స్వాతంత్య్రం పొందిందిది.