ఔరా... అమెజాన్‌!

ఔరా... అమెజాన్‌!

అమెజాన్‌... ప్రపంచంలోనే పేద్ద అడవి. అంత వరకే మనకు తెలుసు కదూ. అబ్బురపరిచే విశేషాలు, అవునా అని ఆశ్చర్యపోయే విషయాలు దీనిలో బోలెడున్నాయి తెలుసా? కావాలంటే ఇది చదివి చూడండి..

* గ్రీకు పురాణాల్లో ఉన్న అమెజాన్స్‌ అనే పదం నుంచి ‘అమెజాన్‌’ అనే పదం వచ్చింది. వీరనారి అనిదీనర్థం.
* దక్షిణ అమెరికా ఖండంలో తొమ్మిది దేశాల్లో అమెజాన్‌ విస్తరించి ఉంది. ఎక్కువ భాగం అంటే 60శాతం ఒక్క బ్రెజిల్‌లోనే ఉంటే మిగిలినది పెరూ, కొలంబియా, వెనిజులా, ఈక్విడార్‌, బొలీవియా, గయానా, సురినామ్‌, ఫ్రెంచ్‌ గుయానాల్లో ఉంది.

* సరాసరిన చూస్తే గత 111 ఏళ్లలో ఇక్కడ ప్రతి మూడు రోజులకూ ఓకొత్త జాతి బయటపడుతోందట. దీన్ని బట్టే అర్థమవుతోంది కదూ... ఇదో జంతువుల గని అని!
* తాజా నివేదికలు చూస్తే 2014, 2015ల్లోనే ఇక్కడ 381 కొత్త జాతులు బయటపడ్డాయి. వాటిలో నదుల్లో జీవించే గులాబిరంగు డాల్ఫిన్‌, ఫైర్‌టైల్‌ కోతులులాంటి గమ్మత్తయిన జంతువులూ ఉన్నాయి.
* బుల్లికీటకాలే 25 లక్షలకు పైగా ఉన్నాయని అంచనా.
* ఈ అడవిలో ప్రవహించే అమెజాన్‌ నదిపైన ఒక్క వంతెనా లేదంటే నమ్ముతారా?
* ఈ అమెజాన్‌ నది అట్లాంటిక్‌ మహాసముద్రంలో కలుస్తుంది. పెద్ద ఎత్తున మంచి నీళ్లు దీని ద్వారా సముద్రంలో కలుస్తాయి. అందుకే ఈ నది కలిసే ప్రాంతంలో సముద్ర నీరు ఉప్పగా కాకుండా మంచిగానే ఉంటుందట.

* 55,00,000 చదరపు కిలోమీటర్ల అడవి ఇది. ఈ అడవంతా కలిపి ఒక దేశమై ఉంటే ప్రపంచంలోని అతి పెద్ద దేశాల్లో 9వ స్థానంలో ఉండి ఉండేది!
* ప్రపంచంలో ఉన్న వర్షాధార అడవులన్నీ కలిపినా ఒక్క అమెజాన్‌ అంత ఉండవు.
* ప్రపంచవ్యాప్తంగా మనందరికీ అవసరమయ్యే ఆక్సిజన్‌లో 20% ఈ అమెజాన్‌ అడవుల నుంచే ఉత్పత్తి అవుతుంది. అందుకే వీటిని ప్రపంచానికి వూపిరితిత్తులు అని పిలుస్తారు.
* ప్రపంచ వ్యాప్తంగా అందరూ తినే 80% ఆహార పదార్థాలకు మూలం ఈ అడవే.
* ఇక్కడ 3000 రకాలకు పైగా పళ్ల చెట్లున్నాయి. వాటిలో మనం తినేవి కేవలం 200 రకాలే. అంటే మనకు తెలియని పళ్లు ఇంకా ఇక్కడ 2800 ఉన్నాయన్నమాట.
* సరాసరిన చూస్తే ఈ అడవిలోని ప్రతి రెండున్నర ఎకరాల భూమిలో 750 రకాల చెట్లు, 1500 రకాలకు పైగా మొక్కలు ఉన్నాయి.
* చెట్లు కొట్టేస్తూ ఇక్కడి భూమినీ చెట్లు లేకుండా చేసేస్తున్నాం. ఇలా సెకనుకు 1.5 ఎకరాల అటవీ భూమి తరిగిపోతోంది. ఇది ఇలాగే కొనసాగితే మరో 40 ఏళ్లలో ఈ అడవి మొత్తం నామరూపాల్లేకుండా పోతుంది.