ఈ పాప్‌కార్న్‌ని చూడగలం.. తినలేం !

పాప్‌కార్న్‌ అంటే మనకు భలే ఇష్టం కదూ... ఓ దగ్గరేమో బీచ్‌ అంతా పాప్‌ కార్న్‌తో నిండిపోయింది... అబ్బ.. తినేద్దాం అనుకుంటే కార్న్‌లో కాలేసినట్లే... ఎందుకంటే అది తినలేనిది మరి...  ఎందుకో? అదెక్కడో? ఏంటో? బీచ్‌ అంటే మనందరికీ ముందుగా గుర్తొచ్చేసేది ఇసుకే కదా. కానీ ఓ బీచ్‌ని గుర్తు తెచ్చుకుంటే మాత్రం ఇసుకకు బదులుగా పాప్‌కార్న్‌ గుర్తొస్తుంది. నిజ్జంగానా? అనకండి. ఎందుకంటే అది అబద్ధపు పాప్‌కార్న్‌ మరి. 
 

* ఈ బీచ్‌ ఎక్కడుందంటే స్పెయిన్‌లో. అక్కడున్న కేనరీ దీవుల్లో. 
* మామూలుగా ఈ దీవులన్నీ అందమైన ఇసుక బీచ్‌లకు పెట్టింది పేరు. కానీ అక్కడున్న ఓ బీచ్‌కి మాత్రం పాప్‌కార్న్‌ బీచ్‌ అని పేరు. ఎందుకంటే ఆ తీరమంతా పాప్‌కార్న్‌ని పోలినవి ఉంటాయి. 
* తెల్లటి పేలాల్లాంటివి లక్షలాదిగా బీచ్‌ అంతా పరుచుకుని ఉంటాయి. ఒక్కసారిగా చూస్తే బోలెడు పేలాల్ని తెచ్చి ఎవరైనా బీచ్‌లో కుమ్మరించారా? అని సందేహం వచ్చేస్తుంది. 
* కానీ అవన్నీ అచ్చమైన పేలాలూ కావు. ఇసుకా కాదు. రాళ్లూ కావు. 
* అయితే అసలు వీటి రహస్యమేంటి? ఇవన్నీ ఇలా పేలాల్లా ఎందుకు ఉన్నాయి అంటే? పెద్ద కారణాలేం లేవు. అవి ఓ రకమైన చిన్న పగడపు దిబ్బలట. అవే ఈ తీరంలో పరుచుకుని ఇలా అలరిస్తున్నాయట. 
* అయితే ఈ తీరంలో కూర్చుని సేద తీరదామంటే ఈ పాప్‌కార్న్‌ల ఇసుక అంత సౌకర్యంగా ఉండవు. అయినా సరే అచ్చంగా వీటిని చూడ్డానికే పర్యటకులు ఈ తీరానికి వస్తుంటారు. భలే ఉంది కదూ. మనమూ చూసొద్దామా!